Taxtaqoracha dovoni 5-dekabr kuni soat 09:00 dan vaqtincha yopiladi. Bu haqda Yo‘l harakati xavfsizligi xizmati xabar berdi.
Ma’lum qilinishicha, Samarqand va Qashqadaryo viloyatlarini bog‘lovchi dovonda favqulodda vaziyatlarni oldini olish maqsadida amaliy o‘quv mashg‘uloti o‘tkaziladi.
Mashq davomida yirik toshlarni xavfsiz tushirish ishlari amalga oshirilib, dovonda transportlar harakati vaqtincha cheklanadi.
“Barcha haydovchilardan tashkil etilgan chora-tadbirlarni to‘g‘ri tushunushlarini, tartibga soluvchilarning ishoralariga rioya qilishlarini so‘raymiz” deyiladi xabarda.
Bundan bir necha kun avval ham yo‘l atrofidagi ko‘chki va tosh qulashi xavfi mavjud bo‘lgan hududlarda tegishli muhandis-texnik tadbirlar amalga oshirilgandi.
Mutaxassislarning xulosasiga ko‘ra, ushbu dovondan o‘tuvchi avtomobil yo‘liga tosh tushish xavfi bo‘lgan 17 ta joylardan viloyat Favqulodda vaziyatlar boshqarmasi qutqaruv otryadi qutqaruvchilari tomonidan majburiy tosh tushirish ishlari olib borildi.
6-noyabr kuni ushbu dovonda baxtsiz hodisa sodir bo‘lgandi. Ichida uch kishi bo‘lgan Cobalt’ga yirik tosh qulagan. Ularning barchasi voqea joyida halok bo‘lgan. Qurbonlarning ikki nafari Vengriya fuqarosi bo‘lgan.
Izoh (0)