Буюк Британия бош вазири Кир Стармер унинг мамлакати хавфсизлик кафолатларини таъминлаш учун Украинага қўшин юборишга тайёрлигини айтди. Бу ҳақда у The Telegraph нашрига берган интервьюсида маълум қилди.
Стармернинг сўзларига кўра, ҳар йили Британия Украинани қўллаб-қувватлаш учун тахминан 3 миллиард фунт ажратади. Бу ёрдам 2030 йилгача мўлжалланган. У Украина учун хавфсизлик кафолатларини тезлаштириш бўйича ишларга ўз ҳиссасини қўшишга тайёрлигини ҳам қўшимча қилди.
Бу, шунингдек, зарурат туғилганда, ўз қўшинларимизни жойлаштириш орқали Украина хавфсизлигини таъминлашга ҳисса қўшишга тайёр эканимиз ва истагимизни англатади. Бу енгил-елпи гап эмас.Британиялик ҳарбий хизматчиларни хавф остига қўйиш масъулиятини жуда чуқур ҳис этаман. Бироқ, Украина хавфсизлигини таъминлашга кўмаклашиш қитъамиз ва мамлакатимиз хавфсизлигини кафолатлашга ёрдам беради, деди Стармер.
Унинг таъкидлашича, Украина хавфсизлигини таъминлаш бутун қитъада хавфсизликни кафолатлашга ёрдам беради. Бу Стармернинг Украина ҳудудига тинчликпарвар кучларни киритишни оммавий равишда ваъда қилган биринчи ҳолатидир. Унинг баёноти 17 февраль куни Парижда Европа етакчилари билан бўладиган учрашув арафасида янгради.
Украина президенти Владимир Зеленский аввалроқ мамлакат чегара чизиғини назорат қилиш учун тахминан 100 минг нафар ғарблик тинчликпарвар кучлар керак бўлишини айтганди. Шу билан бирга, Москва ғарблик тинчликпарвар кучларни Украина ҳудудига киритиш ғоясига қатъиян қарши.
АҚШ вице-президенти Путин тинчлик келишувидан воз кечган тақдирда Украинага қўшин киритилиши мумкинлигини истисно этмаган. 12 февраль куни АҚШ президенти Дональд Трамп россиялик ҳамкасби Владимир Путин билан телефон орқали суҳбатлашди. Кремль музокаралар ўтказилганини тасдиқлади ва Трампни Москвага таклиф этди.
Трамп мазкур суҳбатдан сўнг Украина президентига ҳам қўнғироқ қилди. Зеленскийнинг сўзларига кўра, трамп суҳбатда Путин билан бўлган мулоқотнинг тафсилотларини айтиб берган. АҚШ президенти Украина раҳбари ҳам, Путин сингари, тинчлик ўрнатишни истаётганини айтган.
14 февраль куни эса Трамп Саудия Арабистонида Украинадаги можарони ҳал этиш бўйича музокаралар ўтказилишини маълум қилди.
Изоҳ (0)