Bugun, 19-may kuni AOKAda bo‘lib o‘tgan matbuot anjumanida Favqulodda vaziyatlar vazirligi anchadan buyon portlashlar yuz berayotgan Boysundagi “Mustaqillikning 25 yilligi” konidagi holat yuzasidan izoh berdi.
Anjumanda jurnalistlar tomonidan Boysundagi gaz konida hali ham gaz portlashlari yuz berayotgani va holat shu zaylda davom etsa aholini evakuatsiya qilish reja qilinganmi, degan savol berildi. FVV axborot xizmati rahbari o‘rinbosari Samandar Hikmatullayevning javob berishicha, Boysunda qadimdan gaz sizib chiqishi va bundan odamlarni zaharlanish holatlari kuzatilgan.
Gaz ikkita qatlam orasida paydo bo‘ladi. O‘sha ikki qatlam orasida juda ko‘p yillar davomida gaz konlari paydo bo‘ladi. Boysun tog‘oldi hudud hisoblanadi. Qadimdan bu joylarda gaz sizib chiqqan va zaharlanish bo‘lgan. Gaz sizib chiqishini aholi oldin ham bilgan, dedi Samandar Hikmatullayev.
Uning aytishicha, vazirlikda Boysunda ro‘y berayotgan hodisa yuzasidan oxirgi maʼlumot yo‘q.
Burg‘ilash kuchli bo‘lgani uchun qatlamlar orasidagi gaz yuqori bosimda chiqib ketishni boshlagan. Ayni kunlarda chiqayotgan gaz yoqib qo‘yilgan. Bundan maqsad atrof-muhitni turli zararli gazlardan muhofaza qilish. Yonib ketganidan keyin u yerda gaz to‘planib qolmaydi va bu aholiga taʼsir qilmaydi.
Hozir bu yerda muhandislik-texnik tadbirlar amalga oshirilmoqda. Maxsus tashkilotlar chiqayotgan gazni jilovlash ishlarini olib bormoqda. Hozir qo‘limda aniq maʼlumotlar yo‘q. ERIEL degan tashkilot burg‘ilash ishlarini olib bormoqda, asosiy maʼlumotlar ularda, dedi FVV vakili.
Eslatib o‘tamiz, Surxondaryo viloyatining Boysun tumanidagi “Mustaqillikning 25 yilligi” konida 5-may kuni, 27-mart kuni otilib chiqqan gaz yoqib qo‘yilgan. 22-aprel kuni quduq o‘qining g‘ovlanib tushgani va kolonna chiqib ketishi natijasida fontanlanish to‘xtagan, hodisa joyida gazning sust oqimi (grifon) kuzatilgan.
Boysun konidagi avariya
- 2014-yil 1-sentyabr kuni soat 15:17 da Surxondaryo viloyati Boysun tumani “Ko‘lqamish” MFY hududida joylashgan “Mustaqillikning 25 yilligi” koniga qarashli 604-son qudug‘ida burg‘ilash ishlari olib borish vaqtida texnologik jarayonning buzilishi oqibatida oltingugurt (vodorod sulfid) gazi chiqishi kuzatilgan.
- Aholi xavfsizligini ta’minlash maqsadida kon yaqinida yashovchi fuqarolar xavfsiz hududga evakuatsiya qilingan. Prezident topshirig‘iga asosan bosh vazir o‘rinbosari Ochilboy Ramatov, favqulodda vaziyatlar vaziri Abdulla Qo‘ldoshev, energetika vaziri Jo‘rabek Mirzamahmudov, Surxondaryo viloyati hokimi Ulug‘bek Qosimov hamda “O‘zbekneftgaz” boshqaruv raisi Bahodir Siddiqov hodisa joyiga yetib borgan.
- 15-sentyabr kuni soat 16:50 da sizib chiqish to‘xtatilgan. Ammo mazkur konda 17-sentyabr kuni yana gaz chiqish holati yuz bergan. Yangi avariya oqibatida to‘rt kishi halok bo‘lgan.
Izoh (0)