Amerikalik milliarder Ilon Maskning SpaceX kompaniyasiga tegishli Starship raketasi to‘qqizinchi sinov parvozi paytida nosozlikka uchradi. Bu haqda kompaniya o‘zining X ijtimoiy tarmog‘ida ma’lum qildi.
Ma’lum qilinishicha, 27-may kuni kosmik kema orbitaga chiqqan, biroq ma’lum vaqt o‘tgach, uning parvoz balandligini boshqarish tizimi ishdan chiqqan. Yer atrofida bir marta aylanishdan so‘ng, Starship boshqaruvni yo‘qotgan va Hind okeani ustida atmosferaga kirishni boshlagan.
Parvoz boshlanganidan 10 daqiqa o‘tgach, kosmik kema bilan aloqa uzilgan. U Avstraliyaning shimoli-g‘arbida yumshoq qo‘nishni amalga oshirishi kerak edi.
SpaceX xabar berishicha, parvoz paytida texnik sabablarga ko‘ra, sinov doirasida rejalashtirilgan sakkizta Starlink mini sun’iy yo‘ldosh imitatorlarini chiqarish uchun lyuk ochilmagan. Ilgari raketa sakkiz marta uchirilgan bo‘lib, shulardan faqat to‘rttasi muvaffaqiyatli bo‘lgan edi.
Ilon Mask Starship’ni rivojlantirish uchun milliardlab dollar sarflagan. Bu tashabbus uning kosmik kema yordamida Mars sayyorasini mustamlaka qilish rejasining bir qismidir. SpaceX 50 yildan ortiq vaqt ichida birinchi marta odamlarni Oyga yuborish uchun AQSH davlat agentligi — NASA bilan ishlamoqda.
Tez-tez uchrab turadigan nosozliklar va raketalarning katta o‘lchamlari sababli SpaceX’ning sinov parvozlari hozirgacha bir necha bor AQSHning janubiy shtatlari hamda Karib dengizi hududlariga raketa bo‘laklarining tushishiga sabab bo‘lgan.
Ma’lumot o‘rnida, Starship kosmik kemasi yettinchi va sakkizinchi sinov parvozi vaqtida portlab ketgandi.
Izoh (0)