SpaceX 33 ta Raptor dvigatelidan iborat “to‘plam” o‘rnatilgan Super Heavy raketasini namoyish etdi

Amerikaning SpaceX korporatsiyasi Twitter’da ikkita fotosuratni chop etdi, ularda Super Heavy raketasi va Starship kosmik kemasiga o‘rnatilgan Raptor dvigatellarining ulkan “to‘plami” aks etgan. E’tiborlisi, kompaniya egasi Ilon Mask bu suratlarni e’lon qilmagan.

Fotosuratda ba’zi dvigatellarning rangi farqlanishi ko‘rsatilgan. Ehtimol, bu hali seriyali nusxalar emas, balki prototiplar. Biroq ta’kidlanishicha, ular foydalanishga tayyor.

Avvalroq Ilon Mask gigant Starship SN24 va Super Heavy Booster 7 ni aks ettiruvchi suratlarni chop etgan edi.

Oldinroq esa milliarder yoz o‘rtalariga kelib ucha oladigan Starship raketasi prototipi tayyor bo‘lishini aytgan edi. Maskning ta’kidlashicha, “Avgust oyida uchishga tayyor ikkinchi Starship prototipi bo‘ladi”. Kompaniyaning o‘zi esa oylik reyslarni amalga oshirish niyatida.