Тошкентда белгиланмаган жойга чиқинди ташлаётганларга қарши рейд бошланди

Тошкент шаҳрида белгиланмаган жойларга чиқинди ташлаётган қоидабузарларга қарши оммавий рейдлар ўтказилмоқда. Бу ҳақда пойтахт ҳокимлиги матбуот хизмати хабар берди.

Қайд этилишича, ушбу рейдлар ҳуқуқ-тартибот органлари билан ҳамкорликда олиб борилмоқда. Ҳокимлик шаҳарликлар мурожаатларини диққат билан тинглаб, пойтахтда тозаликни сақлаш учун қатъий чоралар кўрмоқда. Белгиланмаган жойларга чиқинди ташлаётганларга нисбатан амалдаги маъмурий жавобгарлик тўғрисидаги қонунларга мувофиқ жазо чоралари қўлланади.

Шаҳарда тозалик ва тартиб ҳар бир фуқаронинг масъулиятидир. Биз аҳолини қоидаларга риоя қилишга, атроф-муҳитни ҳурмат қилишга ва она шаҳрининг ифлосланишига йўл қўймасликка чақирамиз. Тошкент — барчамизнинг умумий уйимиз. Уни биргаликда тозароқ қилайлик, дейилади ҳокимлик хабарида.

Чиқиндиларини белгиланмаган жойларга ташлаганлик учун қандай жавобгарлик бор?

Маъмурий жавобгарлик тўғрисидаги кодекснинг 91-1-моддасига кўра, белгиланмаган жойларга қаттиқ маиший ва қурилиш чиқиндиларини ташлаш, шунингдек суюқ маиший чиқиндиларни тўкиш

• фуқароларга БҲМнинг 1 бараваридан 3 бараваригача (375 минг сўмдан 1 миллион 125 минг сўмгача),
• мансабдорларга эса 10 бараваридан 20 бараваригача (3 миллион 750 минг сўмдан 7 миллион 500 минг сўмгача) миқдорда жарима солишга сабаб бўлади.

Худди шундай ҳуқуқбузарлик маъмурий жазо чораси қўлланганидан кейин бир йил давомида такрор содир этилса:

• фуқароларга БҲМнинг 5 бараваридан 10 бараваригача (1 миллион 875 минг сўмдан 3 миллион 750 минг сўмгача )
• мансабдорларга БҲМнинг 20 бараваридан 30 бараваригача (7 миллион 500 минг сўмдан 11 миллион 250 минг сўмгача) миқдорда жарима солинади.

Маиший ва қурилиш чиқиндилари полигонларига жойлаштирилиши керак бўлган чиқиндиларни белгиланмаган жойларга ташлаш

• фуқароларга БҲМнинг 5 бараваридан 10 бараваригача,
• мансабдорларга БҲМнинг 20 бараваридан 30 бараваригача миқдорда жарима солишга сабаб бўлади.

Ҳуқуқбузарлик 1 йил давомида такрор содир этилса, фуқароларга БҲМнинг 10 бараваридан 15 бараваригача (375 минг сўмдан 5 миллион 620 минг сўмгача), мансабдорларга эса 30 бараваридан 50 бараваригача (11 миллион 250 минг сўмдан 18 миллион 750 минг сўмгача) миқдорда жарима тайинланади.