“Миллий тикланиш” партияси раҳбари Алишер Қодиров Россиянинг Украинага тажовузкор босқинчилиги ўзини оқлаши ҳам мумкинлигини айтди.
“Россиянинг Украинага тажовузкор босқинчилиги Евросиёни АҚШдан узиб олиш ва қитъани зўравонликлардан ҳоли, тенгликка таянган коллектив келишувлар асосида биргаликда тараққиёт йўлига олиб келса, ўзини оқлаши ҳам мумкин”, дейди депутат.
Алишер Қодиров бордию нео-империализм, АҚШни Украинага таклиф қилганидек: “рухсат берилган даражада эркинлик ва ерости бойликлари ҳисобига тинчлик” муносабатларига олиб келса, инсониятни жуда қуюқ қора кунлар кутиб турганини таъкидлади.
Депутат америкалик сиёсатшунос, социолог, АҚШ президенти Жимми Картернинг миллий хавфсизлик масалалари бўйича маслаҳатчиси бўлиб фаолият юритган Збигнев Бзижинскийнинг “Буюк шахмат доскаси” китобидан парчани ҳам келтириб ўтди.
“АҚШ ҳеч қачон Евросиё қитъасида ҳал қилувчи сўз соҳиби бўлмаган, иккинчи жаҳон урушидан кейин пайдо бўлган бу имконият ақл билан фойдаланилса АҚШни дунёнинг тараққиёт локомотивига айлантиради”, дейилган Америкадаги стратегларнинг геосиёсий қарашларини яхши ифодалаган китобдан олинган парчада.
Депутат АҚШ президенти Трампнинг Европа иттифоқи товарларига бож жорий қилиш ваъдасини шарҳлаган Франция президенти Макрон, Европа “бахтли вассаллик” ҳолатидан чиқиб кетиш кераклигини таъкидлаганини ҳам эслатиб ўтди.
“АҚШга бизни жавобимиз бунга бизни қарши эканлигимизни билдириб қўйиши керак. Биз таваккал қилиш, иштиёқ ва куч таъмини қайтаришимиз зарур”, деган Эммануэл Макрон.
Украинадаги уруш: стратегик истиқболлар
28 февраль куни АҚШ президенти Дональд Трамп Владимир Зеленский билан Оқ уйда учрашганди. Украина раҳбари Киев ўт очишни тўхтатишга тайёр эмаслиги ва Вашингтондан хавфсизлик кафолатига муҳтож эканини айтганидан кейин вазият таранглашган ва учрашув асабий оҳангда якунланди.
Associated Press’нинг ёзишича, Трамп Зеленскийни Украинанинг қимматбаҳо минералларига эгалик қилиш ҳуқуқини берувчи келишувга мажбурламоқчи. Шунингдек, уни Америка раҳбарининг шартларига кўра урушни дипломатик йўл билан ҳал қилишга ундамоқчи.
Президент Дональд Трамп можарони ҳал қилишнинг якуний шартлари бўйича узоқроқ музокаралар олиб бориш учун тезроқ ўт очишни тўхтатишга эришмоқчи. Бироқ таҳлилчилар бу режа муваффақиятсизликка учрашини айтмоқда.
Шу шароитда Буюк Британия ва Франция раҳбарлари Украина билан ҳамкорликда ўз тинчлик режасини ишлаб чиқишни бошлаган. Мазкур қўшма режа кейинчалик АҚШ президентига тақдим этилиши кутилмоқда.
Изоҳ (0)