Хитойда расмийлар аҳолининг қаришига қарши чора-тадбирлар режасини ишлаб чиқди. У туғилиш сонини кўпайтириш мақсадида ота-оналарга болалар парвариши учун субсидиялар ажратиш, мактабгача таълим муассасаларини бепул қилиш масаласи ўз ичига олади. Бу ҳақида Reuters хабар берди.
Мамлакат аҳолиси сони 2025 йилга қадар кетма-кет уч йил камайди. Расмийларнинг ёш эр-хотинларни турмуш қуриш ва фарзанд кўришга ундашга қаратилган саъй-ҳаракатларига қарамай, никоҳлар сони бешдан бир қисмга камайди. Бу эса мамлакат тарихидаги рекорд даражадаги пасайиш ҳисобланади.
2035 йилга бориб 60 ва ундан катта ёшдагилар сони 40 фоизга кўпайиб, 400 миллиондан ошиши кутилмоқда. Бу Буюк Британия ва Қўшма Штатлар аҳолисининг умумий сонига тенгдир.
Дунёнинг иккинчи йирик иқтисодий қудратига эга бўлган давлат учун бу вазият жиддий муаммо ҳисобланади. Хитой ҳукумати энг кам нафақа миқдорини 20 юанга (2,75 долларга) оширишини маълум қилган.
Шунингдек, қишлоқ жойларда яшовчи ҳамда жисмоний имконияти чекланган кексаларга жамоатчилик томонидан ғамхўрликни ошириш масалаларига ҳам алоҳида эътибор қаратилди.
Айниқса, қишлоқ жойларидаги болалар, меҳнат муҳожирлари фарзандлари ваҳомиладорликнинг дастлабки босқичида бўлган аёлларга ғамхўрлик кучайтирилади, дейди расмийлар.
Хитойдаги демографик таназзулнинг аксарияти 1980—2015 йиллар оралиғида жорий этилган бир бола сиёсати билан боғлиқ. 2021 йилга келиб эса эр-хотинларга учтагача фарзанд кўришга рухсат берилган.
Ёш хитойликларнинг фарзанд кўриш истаги йўқлиги, асосан, болаларни тарбиялаш билан боғлиқ юқори харажатлар, турмуш қуришни истамаслик ёки оиланинг карьерага салбий таъсири борасидаги хавотирлар билан изоҳланмоқда.
Шундан сўнг расмийлар эр-хотинларни фарзанд кўришга ундаш учун рағбатлантириш чораларини кўришга ҳаракат қилган: туғруқ таътилини кенгайтириш, фарзанд кўриш учун молиявий ва солиқ имтиёзлари, уй-жой субсидиялари шулар жумласидандир.
Изоҳ (0)