Хитой жамоат хавфсизлиги вазирлиги маълумотларига кўра, 2020 йилда мамлакатда туғилиш даражаси аввалги йилга нисбатан 30 фоизга камайган. Бу ҳақда «Интерфакс» хабар берди.
«2020 йилда жамоат хавфсизлиги органлари томонидан доимий яшаш жойида рўйхатдан ўтган янги туғилган чақалоқларнинг сони 10 миллион 35 минг нафарни ташкил этди, шулардан 5,29 миллиони ёки 52,7 фоизини ўғил болалар, 4,74 миллиони ёки 47,3 фоизини қизлар ташкил этади»,— дейилади вазирлик ҳисоботида.
Миллий статистика бюросининг маълумотларига кўра, Хитойда 2019 йилда 14,65 миллион, 2018 йилда 15,23 миллион, 2017 йилда 17,23 миллион ва 2016 йилда 17,86 миллион чақалоқ туғилган. Шу тарзда 2020 йилда янги туғилган чақалоқлар сони 30 фоизга камайган.1979 йилдан 2016 йилгача Хитой «бир оилада бир бола» сиёсатини олиб борди. Бунинг салбий оқибатларидан бири сифатида меҳнатга лаёқатли аҳолининг қисқариши юзага келди. Энди мамлакатдаги исталган оила иккита фарзандли бўлиши мумкин.
Аввалроқ Тожикистонда 2020 йилда вафот этганлар сони 2019 йилга нисбатан 8,6 мингга кўпайгани ҳақида хабар берилганди. Хабарга кўра, ўлимларнинг аксарияти юрак хасталиги туфайли юз берган.
Россияда эса 2020 йилда аҳоли сони рекорд даражада пасайган. Аҳоли сони 510,5 минг кишига камайиб, бу 2005 йилдан буён энг кескин пасайиш бўлган.
Изоҳ (0)