Ўзбекистонда энергия сотиш компаниялари ўзи даромад кўрмагунича соҳада ўзгариш бўлмайди. Бу ҳақда Олий Мажлис Қонунчилик палатаси депутати Алишер Қодиров маълум қилди.
Унинг таъкидлашича, автосаноатда монополия тугамаса автомашина нархлари ўзгармаганидек, энергетикада ҳам монополия тугамас, нархлар ўзгармас экан, аҳолини газ ва электр билан таъминлашда сифат ўзгармайди.
«Сифатли таъминот учун яроқли тармоқлар бўлиши керак. Тармоқлар яроқли бўлиши учун мунтазам ва қиммат таъмир ишлари талаб қилинади. Бу бюджет учун оғир, қарзга қилиш — тешик идишга сув қуйгандек гап, инвесторлар эса давлат билан шерикчилик қилишни исташмайди», — дейди депутат.
Алишер Қодировнинг сўзларига кўра, аҳолини электр ва газ билан таъминлашдаги муаммо ресурс етишмовчилиги эмас, бошқарув ва таъминот тизими эскирганида.
«Газ ҳам электр ҳам бор, етмаса сотиб олиш имконияти бор, лекин минглаб километр симлар ва трубалар эскириб кетган. Аҳолини электр ва газ билан таъминлашдаги муаммо ресурс етишмовчилиги эмас, бошқарув ва таъминот тизимининг эскирганида. Истаганингизча энергетика вазирини (ёки мени, фарқи йўқ) танқид қилишингиз мумкин, соҳада ҳаммамиз учун оғир ва оғриқли, вақт талаб қиладиган ислоҳотлар бўлмас экан, муаммо тураверади», — деган у.
Мавзуга доир: Ўзбекистон энерготизимида оғир оқибатли «авария» – блекаут хавфи борлиги маълум қилинди
Изоҳ (0)