Британия ва Германия биргаликда 2 000 километрдан узоқ масофага зарба бера оладиган янги қурол ишлаб чиқади. Бу ҳақда Британия ҳукуматига таяниб Reuters хабар берди.
Лойиҳа 2024 йили икки томон имзолаган мудофаа пактига асосан амалга оширилмоқда. Унда Европа Украинадаги урушнинг кучайишидан ўзини ҳимоя қила олиши зарурлиги кўзда тутилган. Баёнотда лойиҳанинг муддати ва бюджети ҳақида батафсил маълумот берилмаган.
Британия мудофаа вазири Жон Гили ва унинг германиялик ҳамкасби Борис Писториус Берлиндаги учрашувда узоқ масофага учувчи қуролларнинг янги лойиҳаси эълон қилинишини айтган.
“Тобора хавфли бўлиб бораётган дунёда НАТО ва Европа иттифоқчилари бирдам. Ушбу ҳамкорлик бизга мудофаани ўсиш двигателига айлантиришга ёрдам беради. Хусусан, иш ўринлари яратилади, кўникмалар оширилади. Буюк Британия ва Германияга сармоялар кириб келади,” деди Жон Гили.
Вазирлар денгиз патрул ва разведка самолётлари учун торпедаларни сотиб олишни муҳокама қилиши режалаштирилган. Германия Британияда ишлаб чиқарилган ҳарбий кўприкларни сотиб олиши бўйича келишув имзоланиши ҳам кутилмоқда.
Россиянинг бошқа давлатларга эҳтимолий ҳужуми
НАТО доираларидаги манбаларга кўра, Россия Финляндия ва НАТОнинг шарқий қанотидаги бошқа давлатларга ҳужум қилиш режасини ишлаб чиққан. Гап Россия армиясининг бир нечта бўлинмаларининг бир вақтнинг ўзида ҳужуми ҳақида кетмоқда. Унга ўн минглаб аскар жалб қилиниши эҳтимоли борлиги айтилган.
Financial Times нашрига кўра, Россия Япония ва Жанубий Корея билан эҳтимолий уруш учун нишонларнинг батафсил рўйхатини тузган. Рўйхатга 160 та ҳарбий ва фуқаролик инфратузилмаси объектлари — атом электр станциялари, кўприклар, заводлар ва қўмондонлик пунктлари киритилган. 2008–2014 йиллардаги махфий ҳужжатлар Х-101 ракеталари билан зарбалар беришни ва Япония ҳамда Жанубий Кореянинг ҳаво мудофаасини текширишни тасвирлайди.
Европа дипломатияси раҳбари Кая Каллас Россия 2028 йилдаёқ Европа иттифоқига ҳужум қилиши мумкинлигини айтиб, Европани мудофаа харажатларини оширишга чақирган. НАТО билан уруш 4-6 йилдан кейин бўлиши мумкинлиги таъкидланган.
Буюк Британия Россия ҳужумига тайёргарлик кўришни бошлади. Лондонда 2005 йилдан бери илк бор фавқулодда ҳолатдаги ҳаракатлар режаси қайта кўриб чиқилмоқда. У ядровий ҳужумга реакция ва бункерлардан фойдаланиш тартибини ўз ичига олади.
Изоҳ (0)