Малдив президенти Муҳаммад Муиззу 2 май куни дунёдаги энг узоқ матбуот анжуманини ўтказди. У шу орқали Украина президенти Владимир Зеленскийнинг рекордини янгилади, дея хабар бермоқда Тhе Daily Guardian.
Анжуман 2 май куни маҳаллий вақт билан эрталаб соат 10:00 да бошланиб, тун ярмида якунланган. Унда йигирмага яқин мухбир иштирок этган. Барча қатнашчиларга овқат ва ичимликлар тақдим этилган. Марафон давомида ички ва ташқи сиёсат масалалари муҳокама қилинган.
Расмий маълумотларга кўра, матбуот анжумани намоз учун қисқа танаффуслар билан ўтказилган.
France 24 телеканалининг маълум қилишича, анжуман 14 соат-у 54 дақиқа давом этган. Шу тариқа у Зеленскийнинг 2019 йилда ўрнатган 14 соатлик рекордини янгилаган. Ўшанда Зеленский Беларусь президенти Александр Лукашенконинг етти соатдан ортиқ давом этган чиқишини ортда қолдирган эди.
Таъкидланишича, сана тасодифий танланмаган, балки Халқаро матбуот эркинлиги куни муносабати билан ўтказилган. Президент ўз нутқида матбуотнинг демократиядаги ҳал қилувчи аҳамиятини алоҳида қайд этган.
Апрель ойи бошида АҚШда сенат тарихидаги энг узоқ нутқ рекордини янгилади. Рекордчи демократ Кори Букер бўлди, у бир суткадан ортиқ вақт давомида мамлакатнинг амалдаги президенти, республикачи Дональд Трампга қарши нутқ сўзлади.
Букер 31 март, душанба куни кечқурун ўз нутқини бошлади ва фақат 25 соатдан кўпроқ вақт ўтгач, чиқишини якунлаб, залдан чиқиб кетди. Шундай қилиб, сенатор 67 йил аввал жанубий каролиналик сенатор Стром Турмонд томонидан ўрнатилган рекордни янгилади. Турмонд 1957 йилда Фуқаролик ҳуқуқлари тўғрисидаги қонунни қабул қилиш учун 24 соат-у 18 дақиқа нутқ сўзлаган эди.
Муиззу 2023 йил сентябрда ўтказилган сайловларда Малдив президенти этиб сайланган. Шу йили Малдив ороллари “Чегарасиз мухбирлар” ташкилотининг матбуот эркинлиги индексида 180 мамлакат орасида 106-ўриндан 104-ўринга кўтарилди.
Изоҳ (0)