Maldiv prezidenti Muhammad Muizzu 2-may kuni dunyodagi eng uzoq matbuot anjumanini o‘tkazdi. U shu orqali Ukraina prezidenti Vladimir Zelenskiyning rekordini yangiladi, deya xabar bermoqda The Daily Guardian.
Anjuman 2-may kuni mahalliy vaqt bilan ertalab soat 10:00 da boshlanib, tun yarmida yakunlangan. Unda yigirmaga yaqin muxbir ishtirok etgan. Barcha qatnashchilarga ovqat va ichimliklar taqdim etilgan. Marafon davomida ichki va tashqi siyosat masalalari muhokama qilingan.
Rasmiy ma’lumotlarga ko‘ra, matbuot anjumani namoz uchun qisqa tanaffuslar bilan o‘tkazilgan.
France 24 telekanalining ma’lum qilishicha, anjuman 14 soat-u 54 daqiqa davom etgan. Shu tariqa u Zelenskiyning 2019-yilda o‘rnatgan 14 soatlik rekordini yangilagan. O‘shanda Zelenskiy Belarus prezidenti Aleksandr Lukashenkoning yetti soatdan ortiq davom etgan chiqishini ortda qoldirgan edi.
Ta’kidlanishicha, sana tasodifiy tanlanmagan, balki Xalqaro matbuot erkinligi kuni munosabati bilan o‘tkazilgan. Prezident o‘z nutqida matbuotning demokratiyadagi hal qiluvchi ahamiyatini alohida qayd etgan.
Aprel oyi boshida AQSHda senat tarixidagi eng uzoq nutq rekordini yangiladi. Rekordchi demokrat Kori Buker bo‘ldi, u bir sutkadan ortiq vaqt davomida mamlakatning amaldagi prezidenti, respublikachi Donald Trampga qarshi nutq so‘zladi.
Buker 31-mart, dushanba kuni kechqurun o‘z nutqini boshladi va faqat 25 soatdan ko‘proq vaqt o‘tgach, chiqishini yakunlab, zaldan chiqib ketdi. Shunday qilib, senator 67 yil avval janubiy karolinalik senator Strom Turmond tomonidan o‘rnatilgan rekordni yangiladi. Turmond 1957-yilda Fuqarolik huquqlari to‘g‘risidagi qonunni qabul qilish uchun 24 soat-u 18 daqiqa nutq so‘zlagan edi.
Muizzu 2023-yil sentyabrda o‘tkazilgan saylovlarda Maldiv prezidenti etib saylangan. Shu yili Maldiv orollari “Chegarasiz muxbirlar” tashkilotining matbuot erkinligi indeksida 180 mamlakat orasida 106-o‘rindan 104-o‘ringa ko‘tarildi.
Izoh (0)