Ташқи ишлар вазири Владимир Норов ва ШҲТ бош котиби Чжан Мин иштирокида ШҲТ саммити якунлари бўйича брифинг ўтказилди. Бу ҳақда вазирлик ахборот хизмати хабар берди.
«Музокаралар якунлари бўйича рекорд миқдордаги ҳужжатлар — 40 дан ортиқ битим, концепция, дастур ва бошқа қарорлар қабул қилинди, улар ШҲТ фаолиятининг истиқболли йўналишлари бўйича ҳамкорликни сифат жиҳатидан янги амалий мазмун билан тўлдиришга хизмат қилади», — деди Владимир Норов брифингда.
Унинг сўзларига кўра, Шавкат Мирзиёев ШҲТ маконида инқирозли вазиятларни биргаликда бартараф этиш ва барқарор ривожланишга эришиш учун иқтисодиёт, савдо ва инвеститисия соҳаларида ҳамкорликни кенгайтириш зарурлигини таъкидлаган.
Шу муносабат билан ўзгарувчан замонавий воқелик шароитида амалий ҳамкорликнинг самарали моделларини шакллантиришга қаратилган ШҲТнинг кенг форматли янги иқтисодий мулоқотини бошлаш ташаббуси илгари сурилди.
Президент томонидан янги — «Умумий хавфсизлик ва фаровонлик йўлидаги Самарқанд бирдамлиги ташаббуси»нинг илгари сурилиши етакчиларнинг бу галги учрашувидаги муҳим воқеалардан бири бўлди. Саммит иштирокчилари тинчлик ва барқарорликни, кенг халқаро ҳамкорликни таъминлаш ва инсониятнинг барқарор ривожланишига кўмаклашишга қаратилган ушбу ташаббусни бир овоздан маъқуллади. Давлатимиз раҳбари «Самарқанд ташаббуси»нинг биринчи халқаро форумини келаси йили шу ерда — қадимий ва ҳамиша навқирон Самарқанд шаҳрида ўтказишни таклиф қилди, — дейди Норов.
Таъкидланишича, Шанхай ҳамкорлик ташкилоти давлатларининг иқлим ўзгаришига қарши курашда ҳамжиҳатлиги Ўзбекистон президентининг ташкилотга аъзо давлатлар раҳбарлари кенгаши номидан Покистондаги сув тошқинларининг ҳалокатли оқибатларини бартараф этишда ушбу мамлакатни ҳар томонлама ёрдам бериш орқали қўллаб-қувватлаш бўйича жаҳон ҳамжамиятига мурожаатида ҳам ўз ифодасини топди.
Ўзбекистон раислигида ШҲТга иштирокчилари сафини кенгайтириш масаласида сезиларли ютуқларга эришилди. Эроннинг мажбуриятлари тўғрисидаги меморандум имзоланди. Мазкур ҳужжат ушбу мамлакатнинг ШҲТга тўлақонли аъзолигига тўғридан-тўғри йўл очади.Унинг сўзларига кўра, ШҲТ саммити ўзаро боғлиқлик кучайиб бораётган шароитда минтақавий ва глобал кун тартибининг долзарб масалаларини конструктив муҳокама қилиш учун ўз вақтида ва самарали халқаро платформа бўлиб хизмат қилди, шунингдек, барқарорлик, хавфсизлик ва ривожланишни таъминлаш манфаатлари йўлида кўп томонлама ҳамкорликни мустаҳкамлаш учун янги йўлларни аниқлаш имконини берди.Тегишли меморандумларни имзолаш билан Миср ва Қатарнинг ШҲТ мулоқот бўйича ҳамкори мақомини ҳуқуқий расмийлаштириш якунланди. Беларусни ташкилотнинг тўлиқ аъзоси сифатида қабул қилишни бошлаш тўғрисида қарор қабул қилинди. Давлат раҳбарлари, шунингдек, Баҳрайн, Мальдив ороллари, Бирлашган Араб Амирликлари, Қувайт ва Мьянманинг ШҲТ мулоқоти бўйича ҳамкор мақоми ҳақидаги сўровларини қўллаб-қувватлади, — деди ТИВ раҳбари.
Изоҳ (0)