«Ҳиндистоннинг ташкилотга раислиги муваффақиятли ўтишини тилаймиз» — Шерзод Асадов

Президент матбуот котиби Шерзод Асадов бугун, 16 сентябрь кунлари ШҲТнинг Самарқанд саммити тадбирлари якунлари бўйича брифинг ўтказди. Бу ҳақда «Дарё» мухбири хабар берди.

Шерзод Асадов иштирокчилар бирин-кетин ўз юртларига жўнаб кетаётганини айтиб ўтди.

Самарқанд саммитида кенг кўламли масалалар муҳокама қилинган ҳамда бир қатор ғоятда илғор қарорлар қабул қилинганини таҳлил қилар эканмиз, янги феномен - ўзига хос «ШҲТнинг Самарқанд жараёни» кузатилибди, деб айтишимизга барча асосларимиз бор.

Биринчидан, 44 та ҳужжат имзоланиб, Ташкилот тарихида рекорд кўрсаткичга эришилди. Улар нафақат ШҲТ фаолиятининг ҳозирги йўналишларини қамраб олади, балки янги формат ва механизмларни бошлаб беради. Бу ҳақда гап борганда, транспорт ва иқтисодий ўзаро боғлиқлик, саноат ва технологиялар кооперацияси, рақамли тараққиёт ва яшил энергетика борасидаги концептуал дастурларни қайд этиш лозим.

Иккинчидан, ШҲТ иштирокчилари таркибини кўпайтириш бўйича жуда муҳим қарорлар қабул қилинди. Эрон аъзолик ҳақида ташкилот билан меморандум имзолади, Беларусни тўлақонли аъзо сифатида қабул қилиш жараёнини бошлашга қарор қилинди, бешта мамлакат - Баҳрайн, Қувайт, Бирлашган Араб Амирликлари, Мальдив ва Мьянма мулоқот бўйича шерик мақомини олди. Яъни, ШҲТ минтақавий ташкилотдан минтақалараро ҳамкорлик платформасига айланиш жараёнига гувоҳ бўлаяпмиз ва бу жаҳондаги минтақалашув тенденцияларини яққол экс эттирмоқда.

Учинчидан, ташкилотнинг 20 йилдан ошиқ тарихида биринч бор аъзо давлатлар раҳбарлари ШҲТни такомиллаштириш ва модернизация қилишга қаратилган тарихий қарорни қабул қилдилар. Ушбу йирик сиёсий қадам замирида иштирокчи мамлакатларнинг ШҲТ фаолияти, мақсад ва вазифаларини янги воқеликка мослаштиришга интилиши ётади. Бундан ташқари, ушбу қарор Ташкилот бир жойда тўхтаб қолмаслиги, замон билан ҳамнафас бўлиши шарт ва у бунга қодир эканидан далолат беради.

Шу билан Ўзбекистоннинг ШҲТга раислиги ўз ниҳоясига етди ва эстафетани илк бора Ҳиндистон Республикаси қабул қилиб олди. Биз Ҳиндистоннинг ташкилотга раислигини муваффақиятли ўтиши тилаймиз».

Президент матбуот котиби Шерзод Асадов