Бирлашган Миллатлар Ташкилотининг (БМТ) Гаагадаги Халқаро суди 33 та давлатга Украинанинг Россияга қарши геноцид конвенцияси бўйича даъвосига қўшилишга рухсат берди. Бу ҳақда “РИА Новости” хабар берди.

2022 йил 26 февралда Россия “махсус ҳарбий операцияси” бошланганидан кейин Украина Халқаро судга Россияга қарши даъво аризаси билан мурожаат қилди. Жараён геноцид жиноятининг олдини олиш ва жазолаш тўғрисидаги 1948 йилги конвенцияга тегишли.

Россия ташқи ишлар вазири Сергей Лавров даъвонинг “бузуқ мантиқ”қа асослангани ва коллектив Ғарб халқаро адолат меъёрларини “суиистеъмол қилаётганини” айтган.

“БМТ асосий суд органи бўлмиш Халқаро суд геноцид жиноятининг олдини олиш ва жазолаш тўғрисидаги конвенцияга мувофиқ геноцид айбловлари билан боғлиқ бўлган ишга аралашиш тўғрисида 33 та давлатнинг аризаларини қабул қилиш тўғрисида қарор чиқарди”, — дейилади хабарда.

Маълум қилинишича, судга 30 дан ортиқ давлат ариза топширган, жумладан, Австралия, Австрия, Бельгия, Болгария, Канада, Кипр, Дания, Нидерландия, Эстония, Франция, Германия, Греция, Италия, Латвия, Литва, Малта, Янги Зеландия, Норвегия, Польша, Испания, Швеция ва Буюк Британия.