Иқтисодиёт ва молия вазири Жамшид Қўчқоров Санкт-Петербург халқаро газ форумида сўзлаган нутқида табиий газ тўғрисида муҳим янгиликни айтиб ўтди.
“2028 йилда табиий газнинг улгуржи бозорига, 2027 йилда эса электр энергияси бозорига ўтишни якунламоқчимиз. Газ ишлаб чиқариш ҳам бизнинг компаниялар томонидан, ҳам маҳсулот тақсимоти шартномаси доирасида амалга оширилади, бу бўйича ишлаётган янги кичик компаниялар мавжуд.
Биз Ўзбекистонда тоғ-кон бозорида кўпроқ компаниялар бўлишини истаймиз. Ислоҳотлар элементи сифатида айнан самарадорликни ошириш ва табиий газ йўқотилишини камайтириш мақсадида газ тақсимлаш тармоқларини давлат-хусусий шериклик тамойилига ўтказиш дастурини қабул қилдик. Бухоро вилоятида шундай лойиҳа тайёрлаяпмиз”, деди Қўчқоров.
У 85 миллиондан ортиқ аҳолига эга Туркия йилига қарийб 63 миллиард куб метр табиий газ истеъмол қилишини, иқтисодиёти Туркияникидан кичик, аҳолиси 37 миллион киши бўлган Ўзбекистон ҳам деярли шунча миқдорда газ истеъмол қилишини таъкидлади.
Вазирлар Маҳкамасининг қарорига кўра, 2024 йил 1 майдан электр ва табиий газ тарифлари ўзгаради. Қарорга мувофиқ ёқилғи-энергетика ресурсларининг 2024—2025 йилларда босқичма-босқич ўзгарадиган янги нархлари ҳамда шу йилнинг 1 май санасидан эътиборан аҳоли учун электр энергияси ва табиий газ бир ойлик истеъмолининг базавий меъёрлари тасдиқланган эди.
Шу муносабат билан кам таъминланган оилаларга ва айрим тоифадаги истеъмолчиларга ижтимоий ёрдамлар кўрсатилиши айтилганди.
Энергетика вазири Жўрабек Мирзамаҳмудов нархлар кўтарилиши сабабларини маълум қилганди.
Изоҳ (0)