Электр энергияси истеъмоли нотўғри ҳисобланаётганининг сабаби маълум қилинди

Бугун, 1 июль куни ижтимоий тармоқларда электр энергияси истеъмоли нотўғри ҳисобланаётгани айтилган  постлар кўпайиб кетди.

Жумладан, Facebook ижтимоий тармоғидаги “Потребител” гуруҳи иштирокчисининг ёзишича, у тўлов тизимига кириб, ҳисобини текширганда, бир кунда 9,5 кВт электр энергияси сарфлагани кўрсатилган.

“Қизиқ, бир кечада 9,53 кВт ни қандай ишлатишим мумкин? Кондиционер максимум 30 дақиқа давомида ишлади, шунингдек, кир машинасидан фойдаландим, холос. 6 соат ичида шунча электр сарфланиши мумкинми?” деган пост қолдирган Гузаля Величкина исмли фойдаланувчи.

Мазкур постнинг изоҳларида бошқа фойдаланувчилар ҳам тўлов тизимлари орқали ўз ҳисобларини текширганлари, уларда ҳам ҳисоб-китобларидан кўра кўпроқ электр энергияси сарфлангани кўрсатилаётганини маълум қилишган.

“Ҳудудий электр тармоқлари” АЖ матбуот котиби Фахриддин Нуралиев бу постга қуйидагича муносабат билдирганди.

“9,53 кВт бу ўртача кунлик ҳисоблаш. Охирги ҳисоб-китоб шу йилнинг 31 май кунида олинган бўлиб, унда кўрсаткич 5911 кВт бўлган. Жорий ҳисоб-китоб 30 июнь куни олинган ва унда кўрсаткич 6197 кВт.
Фарқ 30 кун ичида 286 кВт ни ташкил қилади. Агар буни бир ойга бўлсангиз, тахминан ўртача кунлик истеъмол 9,53 кВт ни ташкил қилади.

Тизимда жорий кундаги кўрсаткичлар ҳали мавжуд эмаслиги сабабли ҳисоблаш ўртача кундалик истеъмол асосида фақат маълумот учун амалга оширилади”, — деб ёзди Фахриддин Нуралиев.

“Ҳудудий электр тармоқлари” мазкур ҳолатлар юзасидан қуйидагиларни маълум қилди.

Айни кунда бутун республика бўйлаб электр энергияси ҳисобини юритаётган “Электр энергиясини назорат қилиш ва ҳисоблашнинг автоматлаштирилган тизими” (ASKUE) томонидан автомат равишда истеъмол қилинган электр энергиясини ҳар бир истеъмолчи билан ҳисоблашнинг суткалик, ойлик ва йиллик назоратини олиб боради ва буни шаффоф равишда ҳар бир фуқаро кузатиб бориш имкони яратилган.

Ижтимоий тармоқларда тарқалаётган бундай хабарларниг келиб чиқишининг асосий сабаби айрим тўлов тизимларининг “Ҳудудий электр тармоқлар” АЖ билан келишмаган ҳолда, гўёки истеъмолчиларга қулайлик яратиш мақсадида маълумотлар чиқарилгани сабабли кўплаб истеъмолчиларда мана шундай тушунмовчиликлар юзага келган. 

Истеъмолчилар томонидан кунлик истеъмол сифатида кўрсатилган кўрсаткичлар айнан 24 соатлик суткалик истеъмол кўрсаткичлари.

Истеъмолчилардан электр энергияси ҳисоби кўрсаткичлари тўғрисида аниқ ва тўғри маълумотларни “Ҳудудий электр тармоқлари” АЖнинг расмий веб-сайтидага шахсий кабинет орқали олишлари тавсия этилди.