Оъзбекистонда электр энергияси нархи меъёрдан ортиқ ишлатганлар учун тўрт бараваргача оширилади

Ҳукумат қарорига асосан, 2023 йил 1 ноябрдан ўртача ойлик истеъмол миқдоридан ортиқча электр энергияси сарфлаганларга нархлар бир неча баробар қимматлашади.

Қарорга кўра, истеъмол қилинадиган электр энергиясидан оқилона фойдаланиш мақсадида электр энергиясининг қуввати ўртача ойлик истеъмол миқдоридан ошиб кетган III гуруҳ истеъмолчиларига:

• 1 001 дан 5 000 кВт соатгача истеъмол учун белгиланган тарифга нисбатан 2 баробар (590 сўм);
• 5 001 дан 10 000 кВт соатгача истеъмол учун белгиланган тарифга нисбатан 3 баробар (885 сўм);
• 10 000 кВт соатдан юқори истеъмол учун белгиланган тарифга нисбатан 4 баробар (1180 сўм) ўсувчи коэффициент қўлланилади.

Иқтисодчи Отабек Бакировнинг ёзишича, нархларнинг истеъмол миқдорига қараб белгиланиши инқилобий қадам ҳисобланади.

“Ва ниҳоят тўғри қадам босиш бошлангандек. Ниҳоят ҳукумат электр энергияси тарифлари борасида севимли бойлар тарафдан узоқлашиб ижтимоий қатламга қайиша бошлаган. Мана буни адолатли ҳақиқат деса бўлади. Инқилобий адолатли ҳақиқат”,—деб ёзган у.

Аввалроқ Ўзбекистонда газ ва электр нархини босқичма-босқич эркинлаштириш бошлангани хабар қилинганди. Хусусан, жорий йил 1-октябрдан истеъмолчиларнинг 1- ва 2-гуруҳ тоифаси учун электр энергияси нархи1 квт/соатига 1 000 сўмгача (НКМК, ОТМК, Ўзбекистон металлургия заводи, бюджет ташкилотлари), қолган бизнес ва юридик шахслар учун квт/соатига 900 сўмгача оширилди.

Сўнгги марта мамлакатда газ ва электр энергияси тарифлари 2019 йилнинг август ойида ўзгарганди.  Ҳозирда нархлар оширилиши биринчи босқичда юридик шахсларга, тадбиркорларга ва йирик корхоналарга таъсир қилади. Аҳоли учун эса тарифлар ўзгаришсиз қолмоқда.

Ўтган йилги муҳокамаларда электр энергияси ва табиий газ нархларини ижтимоий норма асосида белгилаш ва ошириш назарда тутилганди. Яъни оқилғи-энергетика ресурслари истеъмоли учун нархлар янги тизим асосида ўзгариши таклиф этилган. Хусусан, аҳоли учун 1 кВт соат электр энергияси истеъмоли ойига 250 кВт соатгача – 325 сўм, 250 кВт соатдан юқори ҳар 1 кВт соат учун – 650 сўм этиб белгиланиши айтилган. Аммо айрим сабабларга кўра, ушбу режани амалга ошириш кечиктирилган.