Сурхондарё вилояти Сариосиё тумани Вочах қишлоғи аҳолиси электр энергияси билан таъминланди. Бу ҳақда Олий Мажлис Сенати ахборот хизмати хабар бермоқда.
Айтилишича, апрель ойида қишлоқ аҳолиси Олий Мажлис Сенати аъзоси Абдуғани Сангинов билан учрашувда хонадонларни электр энергияис билан таъминлашни сўраб мурожаат қилган.
“Август ойида Вочах қишлоғида электрлаштириш ишлари бошлаб юборилган эди.
Тоғда ишлайдиган махсус техникалар ва мутахассислар ёрдамида 100 дона махсус темир устун ва электр тармоғи учун 18 минг метр АС-25 сим ҳамда бир дона 160 кВ трансформатор пунктини ўрнатиш ишлари олиб борилди.
Эндиликда вочахликлар хонадони ҳам электр токи ёрдамида ёритиладиган бўлди”, — дейилади сенат ахборотида.
Вочах қишлоғи ҳақида
Сурхондарё вилоятининг Сариосиё туманидаги Вочах қишлоғига 80 йилдан бери “свет” етиб бормаган. Тоғли ҳудудидаги Вочах қишлоғи туман марказидан 65-70 километр узоқликда жойлашган. Бу ерда тахминан 22 хўжалик (15-16 та уйлар) доимий яшаб келмоқда.
Мазкур қишлоқ тоғнинг энг юқори қисмида жойлашган бўлиб, махсус автомашина ва механизмлар юриши имконсиз. Шу сабабли қишлоқ аҳолиси туман марказига чиқиш учун эшак фойдаланади. Вилоятдаги Тўпаланг сув омбори орқали ҳам Вочах қишлоғига етиб бориш мумкин. Бироқ қайиқда сув кечиб ўтиш ва тоғ оралаб босиб ўтиладиган масофага 3 соат вақт талаб этилади.
Қишлоқнинг аёллари темир дазмолдан ичига чўғ солиб ишлатган, болалар эса мойчироқлардан фойдаланиб, дарс қилиб келган.
Вочахда 2004 йилда мактаб барпо этилган. 2021 йилда эса бу ерга 11 дона компьютер жамланмаси келтирилган. Аммо электр энергияси йўқлиги сабабли ушбу компьютерлар бирор маротаба ҳам ёқиб ишлатилмаган ва ўқувчиларга амалий машғулотлар ўтилмаган.
Изоҳ (0)