Айрим режиссёрлар кадрларга нозик ишораларни маҳорат билан сингдирса, бошқалари сюжет бурилишлари ҳақида сир-синоатларни жойлаштиради. Бу сирлар фильмни такроран томоша қилгандагина аён бўлади.
“Дўстлар” сериалидаги яширин белгилар
Сериалнинг бир қисмида Росс Геллер қўл тасвири туширилган кулранг футболка кийган бўлади. Кўпчилик томошабинлар бу расмга эътибор бермаган. Аммо айрим зийрак кузатувчилар сериалнинг либос дизайнери Дебра Макгуайрнинг яширин “шифр”ини тушунган.
Маълум бўлишича, кўрсатилган ишора аслида ситком номига ишора бўлиб, имо-ишора тилида “дўстлар” сўзини англатган.
Стивен Хокинг ва Азкабан маҳбуси
Стивен Хокингнинг машҳур “Вақтнинг қисқача тарихи” китоби “Гарри Поттер ва Азкабан маҳбуси” (2004) фильмида бир лаҳзага кўриниб ўтади.
Сиз ҳам китобга берилиб ўтирган сеҳргарни пайқагандирсиз, бироқ макон ва замон табиати, шунингдек, айнан шу замонда саёҳат қилиш имкониятларига бағишланган китобнинг ўзига эътибор қилиб қарамагансиз. Ким билади, балки Гермиона ҳам вақт туморидан унумлироқ фойдаланиш учун бу китобни синчковлик билан ўрганиб чиққандир.
Кира Найтли ва “ишчиларни эксплуатация қилиш”
“Ёмон хулқ-атворли хоним” (2020) фильмининг бир нечта саҳнасида Кира Найтли “Меҳнаткаш” номли китобни қўлида ушлаб туради ёки диққат билан ўқийди. “Меҳнаткашлар: меҳнат тарихи бўйича тадқиқотлар” — Эрик Хобсбаумнинг Буюк Британияда ишчилар ҳаракати тарихига бағишланган машҳур асаридир.
Фильм 1970 йилги “Дунё гўзали” танловига ва унга қарши феминистларнинг норозилик намойишларига оид реал воқеаларга асосланган. Унда актриса тарихчи ва аёллар озодлик ҳаракати фаоли Салли Александр ролини ижро этади. Шунинг учун ўша даврларда унинг қаҳрамони бундай адабиётга қизиқиши табиий ҳол эди. Ахир, ўша пайтда аёллар ҳам эркаклар билан тенг иш ҳақи олиш ҳуқуқи учун курашаётган эдилар.
Батман Хоакин Фениксга қарши
“Жокер” (2019) фильмида бош қаҳрамоннинг эски рақиби дастлабки кадрлардаёқ пайдо бўлганини кўпчилик сезмай қолади. У бошқа жойда эмас, балки актёрнинг рўпарасида — у доимо грим қилаётганда ўзини кўрадиган кўзгуда намоён бўлади.
Фақат сеҳр эмас
Хогварцда товуқли фрикасе, товуқ шўрва, товуқли салат ва сопол идишларда пиширилган товуқли пирог каби таомлар жуда севиб истеъмол қилинарди. Ўқув йили бошланиши нишонланганда товуқ сонлари дастурхонга тортиларди. Улар битирув кечасининг таомномасида ҳам ўрин оларди.
Бундан ташқари, Гарри, Роналд ва Гермиона Сириус Блек Хогсмид яқинидаги тоғларда яшириниб юрганида унга товуқ жўнатишган эди. Бу масаллиқ сеҳргарлик учун ҳам керак бўларди. Масалан, кўринмаслик дамламасини тайёрлаш учун. Ахир ҳамма ҳам кўринмас плашга эга эмасди-ку.
Таносдан анча аввалги Чексизлик қўлқопи
“Тор: Рагнарек” (2017) фильмининг бир саҳнасида Хела Асгарднинг барча “хазиналари” сохта эканлигини таъкидлайди. Хусусан, у “Қасоскорлар: абадият жанги” фильми билан машҳур бўлган Чексизлик қўлқопини нафрат билан ерга улоқтиради. Бу фильм экранларга фақат бир йилдан кейин чиқиши керак эди. Айтиш мумкинки, Marvel шунчаки ўзининг кейинги фильмларидан бирини шундай усул билан реклама қилишга қарор қилган.
Изоҳ (0)