Дорамалар даври қандай бошланганди? Дунё томошабинларини экран қаршисига михлаган энг машҳур сериаллар

1990 йилларнинг охири 2000 йилларнинг бошларида, дастлабки дорамалар кассеталарга жойлаштирилганида ва бугунги каби рақобат бўлмаганида, минглаб одамлар уларни харид қилиб, қизиқиш билан томоша қилар, қаҳрамонларнинг тақдири учун ташвишланарди. Асосий актёрлар эса ҳақиқий юлдузларга айланарди. Шу даврда ҳинд киносининг даври корейс тўлқини билан алмашди. Ҳозирда бу сериаллар аллақачон корейс кинотеатрининг классикаси ҳисобланади.

Қуйида дорамалар даврини бошлаган 5 та машҳур корейс сериали ҳақида ҳикоя қиламиз.

1. “Қалбим чечаги”

Бу рейтингни, албатта, “Золушка”нинг (корейсча версияси) ҳикояси очиб беради:

Сюжет: Юн И (Чхве Чин Сил) исмли қиз отасининг вафотидан кейин етимхонага тушади ва у ерда отасининг дўсти уни ўз оиласига олиб боради. Ёмон ўгай она, Сон хоним ва ўгай синглиси Юн Ини ўзларининг дунёсига мос эмас деб ҳисоблаб, уни қабул қилмайди. Шунинг учун қаҳрамон ўз бахтини ва тақдирини ўзи қуришга қарор қилади. Ва бунда унга икки келишган йигит ёрдам беради: бири отасининг қаршилигига қарамай, қўшиқчи бўлишни орзу қилган “шаҳзода” Кан Мин (Ан Же Ук) иккинчиси мода уйи бош дизайнери Ли Жун Хи (Ча Ин Пё).

Сериал кўпчиликка нафақат таъсирли сюжети ва актёрлар ижроси, балки “Forever” каби таъсирли қўшиқлари билан ҳам жуда манзур бўлди, бу қўшиқни Ан Же Ук ижро этган:

“Қалбим чечаги” Ўзбекистон телевидениесида намойиш этилган биринчи корейс сериали бўлди. Дорама МДҲ мамлакатларида шунчалик машҳур бўлдики, ҳатто уни рус ва ўзбек тилларига тўлиқ таржима қилишди.

Биринчи марта телевидениенинг ҳити сифатида қизиқарли криминал ва жангари фильмлар эмас, балки томошабинларнинг қалбини эритиб юборадиган нозик ва ҳиссий корейс муҳаббат ҳикоялари пайдо бўлди.

2. “Золушка учун туфли”

Сюжет: Икки опа-сингил, Тхе Хи (Ким Жи Хо) ва Юн Хи (Ким Хён Жу) ҳаёти ҳақида драма. Улар ота-оналарини йўқотади ва тақдирнинг иродаси билан 15 йилга ажралиб қолишади. Улардан бири бегона оиланинг қўлига тушади, хотирасини йўқотади, қашшоқликда яшайди, лекин барибир табассум қилишни давом эттиради. Иккинчиси эса аксинча, асл бобосини топади ва истаган нарсасига эга бўлади. Лекин уни болаликда синглисини йўқотгани учун айбдорлик ҳисси тарк этмайди. Ва тез орада улар ниҳоят бир-бирларини топади ва бир эркакка ошиқ бўлишади...

Бу дорамада “Қуёш хўжайини”, “Оҳ, менинг Венерам” ва бошқа дорамалардаги роллари билан машҳур бўлган ёш Со Жи Сопни кўриш мумкин.

3. “Қиш сонатаси”

Бутун Осиё бўйлаб машҳур бўлган “Қиш сонатаси”нинг охирги қисми Япония телетомошабинларининг тўртдан бир қисмини экранларга михлаб қўйди!

Сюжет: Кан Жун Санг (Пе Ён Жу) исмли ўрта мактаб ўқувчиси Сеулдан онасининг туғилган шаҳрига келади ва янги мактабга ўтади. У жуда ёлғиз ва совуққон. Шунинг учун синфдоши Ю Жин (Чхве Жи У) у билан яқинроқ танишишга қарор қилади. Лекин бир куни мактаб сафарида у ўрмонда йўқолиб қолади ва уни Жун Санг қутқаради. Шу пайтдан бошлаб унинг юрагидаги муз аста-секин эрий бошлайди ва у Ю Жинга ошиқ бўлади. Лекин фожиа содир бўлади: Янги йил байрами арафасида Жун Санг автоҳалокатга учраб ҳалок бўлади...

Орадан 10 йил ўтади. Собиқ синфдошлар яна бирга тўпланиб, Ю Жин ва болалигидан бери унга ошиқ бўлган Сан Хюк (Пак Ён Ха)нинг унаштирувини нишонлайди. Уларнинг дўсти О Че Рин (Пак Сол Ми) ҳам ўз севгилиси Ли Мин Хё билан келади, у вафот этган Жун Сангнинг ўзи бўлиб чиқади...

Сериалнинг баъзи саҳналари суратга олинган Нами ороли (Чунхон шаҳри) Жанубий Кореянинг энг машҳур сайёҳлик жойларидан бирига айланди. Дорама чиққандан кейин сайёҳлар сони уч баравар кўпайди. Меҳмонлар сериалнинг бош қаҳрамонлари каби хиёбонларда сайр қилишлари ёки велосипедда учишлари мумкин.

Шунингдек, у ерда Жун Санг ва Ю Жин персонажларига ўрнатилган ҳайкални кўриш ва унинг ёнида суратга тушиш мумкин.

Номидан ҳам англаб олиш мумкин, сериалда жуда чиройли ва атмосферали мусиқа кўп. Дорама қўшиқлари ўша даврнинг машҳур хонандаси Рю томонидан ижро этилган. Бундан ташқари, скрипка ва фортепиано учун инструментал саундтрекларни, жумладан, “River flows in you”, “Kiss the rain”, “Love hurts” ва бошқа тароналарнинг муаллифи бўлган дунёга машҳур корейс бастакори Йирума асарларини эшитиш мумкин.

Дорама “корейс тўлқинининг” дастлабки намоён бўлишларидан бири эди. Сериалнинг машҳурлиги фонида 2009 йилда унинг аниме версияси, мюзикл, видеоўйинлар чиқди. Ўша пайтда Ўзбекистон бозорларида қаҳрамонлар тасвирланган кўплаб маҳсулотларни (футболкалар, дафтарлар, ручкалар ва бошқалар) топиш мумкин эди.

“Қиш сонатаси” бутун дунё бўйлаб Жанубий Кореяга катта қизиқиш уйғотди ва бундан ҳам ажабланарлиси, ҳатто Япония билан муносабатларни юмшатишга сабаб бўлди.

Чиройли табиат манзаралари, таъсирли ва ҳаяжонли сюжет, актёрларнинг тўғри танлангани, сериал воқеаларига мос келадиган мусиқий безак томошабинларни ўзига жалб қилди, уларни ҳар куни кечқурун янги қисмларни томоша қилишга шошилтирди ва уларда чуқур қайғу, самимият ва ёрқин қувонч каби ҳис-туйғуларни уйғотди.

4. “Сарой жавоҳири”

Тарихий дорамалар корейс кинематографиясида алоҳида ўрин тутади. Айниқса, кучли аёллар тақдири ҳақида ҳикоя қилувчи фильмлар (“Император хоним Ки”, “Қиролича Сондок”, “Чан Ок Чон”).

“Сарой жавоҳири” — халқаро миқёсда ҳитга айланган ва 90 дан ортиқ мамлакатда намойиш этилган биринчи тарихий дорамалардан бири бўлиб, унинг даромади 103 миллион доллардан ошди. Шундан сўнг корейс анъанавий маданияти ва тарихига бўлган қизиқиш Эрон, Туркия, Саудия Арабистони, Перу, Колумбия, Миср, Австралия, АҚШ, Янги Зеландия ва Россия каби мамлакатларда янада кучайди.

Сюжет: Дорама ҳақиқий воқеаларга асосланган ва Чосон сулоласи қироли учун биринчи аёл шифокор бўлишга муваффақ бўлган етим қиз Чан Гим (Ли Ён Э) ҳақида ҳикоя қилади. Ижтимоий камситиш даврида жасур ва қатъиятли қаҳрамон корейс ошхонаси ва тиббиётининг сирларини ўрганиб, ҳукмдорни касалликдан даволашга ҳаракат қилади.

Албатта, сериалда ҳар қандай тарихий драмада бўлгани каби, таъсирли ва айни пайтда фожиали севги ва дўстлик ҳикоялари, сиёсий фитналар ва бошқа қизиқарли сюжет чизиқлари ҳам мавжуд.

Тарихий жанрда фильм суратга олиш жуда қийин, чунки ўтмиш даври воқеаларини барча тафсилотлари билан иложи борича аниқ акс эттириш муҳимдир. Ва ушбу дорама яратувчилари бунга эришди: томошабин корейс табиатининг ранг-баранг манзаралари, улуғвор саройлар, анъанавий кийимлар (ҳанбок) ва безаклар орқали XV аср Чосон атмосферасига шўнғийди.

Ҳатто қаҳрамонлар диалогларида ҳам қадимги корейс тилига хос мураккаб нутқий талаффузни сезиш мумкин. Ва бу тасодифий эмас: актёрлар ўша давр руҳини аниқроқ етказиш учун махсус талаффузни ўрганди. Шунинг учун “Сарой жавоҳири”ни нафақат энг машҳур, балки энг ишончли тарихий дорамалардан бири деб ҳисоблаш мумкин.

5. “Тақдир ўйини”

“Тақдир ўйини” дорамаси, албатта, муваффақиятга эришиши табиий эди. Қизиқарли сюжет, истеъдодли актёрлар, Корея ва Чежу оролининг ажойиб манзаралари, шунингдек, ёқимли мусиқа ва албатта Ли Бён Хоннинг ажойиб ижроси сериал омадли бўлишини таъминлаган.

Сюжет: Болалигида етим қолган Ким Ин Ха (Ли Бён Хон) моҳир қартабоз бўлган амакиси томонидан тарбияланади. Жасур ва ишончли йигит бой оиладан бўлган ўғил — Чхве Ён Вон (Чи Сон) билан яқин дўст бўлади. Кўп ўтмай, Ин Ха Мин Су Ён (Сон Хе Гё) билан танишади ва унга ошиқ бўлади. Аммо у нафақат унинг қалбини, балки энг яхши дўстининг қалбини ҳам забт этади.

Ён Воннинг отасининг ҳийлалари туфайли Ин Ха қотилликда гумон қилиниб, Америкага қочишга мажбур бўлади. Ва у ерда профессионал покер ўйинчиси сифатида мартаба қозониб халқаро миқёсда муваффақиятга эришади. Кореяга қайтиб келган қаҳрамон ўз севгиси учун собиқ дўсти билан курашга киришади.

Сериал энг юқори рейтингларга эришди. Кореяда ҳам, хорижда ҳам машҳурликка, шунингдек, SBS Drama Awards ва Baeksang Arts Awards мукофотларига сазовор бўлди. Ли Бён Хон “Энг яхши телевидение актёри” деб топилди.

Қизиқарли факт: Чи Сон “Тақдир ўйини”даги роли туфайли катта шуҳрат қозонди, бу унинг биринчи жиддий иши бўлди. Дастлаб, сериал яратувчилари Ли Бён Хон учун шерик топишда қийинчиликка дуч келишди, чунки аксарият номзодлар машҳур актёр билан таққосланишдан қўрқиб, рад этишди.

Ўша пайтда бу соҳада янги бўлган Чи Сон, режиссёр Ю Чхол Ённинг ўзидан бу ролни сўради. Актёрнинг ўзи эслатишича, ўша пайтда у Ли Бён Хоннинг истеъдодини ортда қолдиришни хоҳлаган, лекин у қаттиқ ишлаганда ҳам, “бу чўққига чиқа олмаслигини” англаган.

Шунга қарамай, дораманинг муваффақияти туфайли Чи Соннинг истеъдоди эътиборсиз қолмади ва у бошқа машҳур лойиҳаларда (“Сўнгги рақсни менга қолдиринг”, “Хўжайинни ҳимоя қилинг”, “Мени ўлдир, мени давола”, “Сир” ва бошқалар) ролларни олди. Ҳозирда у энг машҳур ва харизматик корейс актёрларидан бири ҳисобланади.

“Тақдир ўйини” сериалининг оригинал саундтреки “Like the first day” Пак Ён Ханинг ижросида ҳақиқий ҳитга айланди (айтганча, “Қиш сонатаси”да Сан Хюк ролини айнан у ўйнаган эди).