Самарқанд дорихоналарида божхона расмийлаштирувидан ўтмаган ва сифат сертификати мавжуд бўлмаган бир неча турдаги контрабанда дори воситалари сотилаётгани аниқланди. Бу ҳақда ЎзА хабар берди.
Соғлиқни сақлаш вазирлиги қошидаги тиббий маҳсулотларни сертификатлаштириш бўйича «Дори воситалари, тиббий буюмлар ва тиббий техника экспертизаси ва стандартлаштириш Давлат маркази» ДУKнинг берган маълумотига кўра, Грузиянинг «Biopolus Ltd» корхонаси томонидан «Unimed Group» корхонаси учун ишлаб чиқарилган: 1. Батронат Серия 010318; 2. Uniflex-Dual Серия 020318; 3. Витацеф Серия 010318; 4. Батферон Серия 010916 дори воситалари марказ лаборатория текширувидан ўтмаган ва уларга божхона расмийлаштирувидан ўтиш ва сотишга рухсат берувчи сифат сертификатлари берилмаган.
Ушбу маълумотлар ҳуқуқ-тартибот органларига тақдим этилди ва Бош прокуратура ҳузуридаги Иқтисодий жиноятларга қарши курашиш Департаменти Самарқанд шаҳар бўлими ҳамда Давлат хавфсизлик хизмати Самарқанд вилоят бошқармасининг қўшма тадбири доирасида 1 миллиард сўмга яқин котрабанда дори воситалари аниқланиб, мусодара қилинди. Ҳозирги кунда ушбу ҳолат юзасидан текширув ҳаракатлари давом этмоқда.
Давлат божхона қўмитаси Ахборот хизмати маълумотига кўра, 2019 йилнинг январь–апрель ойлари давомида божхона хизмати органлари томонидан жами 210 та ҳуқуқбузарлик ҳолатида 9,5 миллард сўмлик сифати кафолатланмаган контрабанда дори воситалари ва тиббиёт буюмлари ашёвий далил сифатида олиб қўйилган.
Эслатиб ўтамиз, истеъмолчилар сотиб олаётган дори воситаларининг сифат сертификати бор ёки йўқлиги бўйича маълумотни Соғлиқни сақлаш вазирлиги қошидаги сертификатлаштириш органининг расмий www.uzpharm-control.uz сайти орқали онлайн тарзда текшириш имконига эга.
Изоҳ (0)