Самарқанд аэропорти чегара-божхона постига АҚШ вакиллари томонидан радиацияни аниқловчи илғор ускуналар топширилди. Бу ҳақда вилоят божхона бошқармаси хабар берди.
Ускуналарни расмий топшириш маросимида АҚШ энергетика вазири ўринбосари ёрдамчиси Кристине Бент ҳамда Давлат божхона қўмитаси раисининг биринчи ўринбосари Илхом Мухторов иштирок этди.
«АҚШнинг энергетика вазирлиги ва Ўзбекистон давлат божхона қўмитаси 2006 йилдан буён ҳамкорлик қилиб келади. Иккала ташкилот ўртасида 2017 йилда меморандум ҳам имзоланган. Шу боис биринчи марта Ўзбекистонда Самарқанд халқаро аэропортини АҚШ ҳудудидан ташқарида ҳеч қайси мамлакатда ўрнатилмаган, сунъий интеллектда ишлайдиган радиациявий моддаларни аниқловчи ускуналар билан таъминладик», — деган АҚШ энергетика вазири ўринбосари ёрдамчиси Кристине Бент.
Қайд этилишича, ускунанинг афзаллиги — инсон саломатлиги учун зарарли бўлган, кўз билан кўриб, қўл билан ушлаб бўлмайдиган радиациявий моддаларни масофадан аниқлаш имкониятига эга. Келажакда бу каби ускуналар бошқа чегара божхона постларига ҳам ўрнатилиши назарда тутилган.
Изоҳ (0)