“Буюк Британия Россиянинг музлатилган активларини Украинага беришга тайёр” — Девид Кемерон

Буюк Британия Украинага Россия марказий банкининг мамлакатдаги музлатилган барча активларини беришга тайёр. Чунки Россия уруш тугаганидан кейин Киевга товон пули тўлашга мажбур бўлади. Бу ҳақда Британия ташқи ишлар вазири Девид Кемерон маълум қилди, деб ёзади The Guardian.

“Украиналикларга бу пулни бериш учун гаров сифатида Россиянинг музлатилган активларидан фойдаланадиган синдикатланган кредит ёки облигациялар каби бирор нарсадан фойдаланиш имконияти мавжуд, чунки биз Россия уни барибир репарация сифатида тўлаб беришини биламиз.

Бу энг яхши йўл бўлиши мумкин. Биз бу масалада G7 ва ЕИнинг максимал бирлигига эришишга ҳаракат қилмоқдамиз, бироқ агар бирлик бўлмаса, биз бундай чораларни кўрмоқчи бўлган иттифоқчилар билан музокараларни давом эттиришга мажбур бўламиз”, — деди вазир.

Унга кўра, активлар репарация тўлаш учун кафолат сифатида ишлатилади. Шунингдек, Кемерон облигация режаси Лондон обрўсига путур етказишига ишонмаслигини ҳам маълум қилди.

Агар АҚШ Конгресси Украинага ёрдамни блоклашда давом этса, бу режа Украина учун, айниқса, фойдали бўлади, чунки бу қурол сотиб олиш ва бюджет тақчиллигини молиялаштириш учун янги маблағ манбасини таъминлайди, деб ҳисобламоқда Кемерон.