Еврокомиссия раҳбари Урсула фон дер Ляйен Россиянинг музлатилган активларини Украина учун қурол сотиб олишга сарфлашни таклиф қилди. Бу ҳақда BBC хабар берди.
Урсула фон дер Ляйенга кўра, Россиянинг Европа Иттифоқида музлатилган активларини Украина армияси эҳтиёжларига сарфлаш керак.
“Музлатилган Россия активларидан катта ҳажмдаги даромадни биргаликда Украина учун ҳарбий техника сотиб олишга сарфлаш ҳақида гапириш вақти келди. Украинани ва бутун Европани одамлар яшаши учун хавфсизроқ қилишдан кўра кучлироқ рамз ва бу маблағларни сарфлашнинг оқилона усули йўқ”, — деди у.
Февраль ойи бошида Европа Иттифоқи етакчилари Украинага 2024-27 йилларда 50 миллиард евро миқдорида молиявий ёрдам ажратиш ҳақидаги қарорини тасдиқлади.
Европа Иттифоқи Украина учун пакетни молиялаштириш йўлларидан бири Европа давлатларида музлатилган Россия активларидан келадиган даромад бўлиши мумкинлигини билдирган.
Европа Иттифоқи, АҚШ, Япония ва Канада Россиянинг Украинага бостириб кириши ортидан 2022 йилда Россия Марказий банкининг 300 миллиард долларга яқин активларини музлатиб қўйган. Улардан 200 миллиардга яқини Европада, асосан, Бельгиянинг Euroclear марказида сақланади.
Яқинда Reuters ўз манбаларига таяниб, Европа Россия Марказий банкининг музлатилган активларини мусодара қилиши даргумонлиги, чунки европалик амалдорлар бу фикрни ҳуқуқий нуқтаи назардан “ўта хавфли” деб ҳисоблаётганини ёзганди.
Бельгия аллақачон Россия активларини сақлашдан солиқ олади. Октябрь ойида мамлакат бош вазири шу йўл билан 1,7 миллиард евро олинганини, бу маблағ Украинани ҳарбий техника ва гуманитар мақсадлар билан таъминлашга сарфланиши кераклигини айтганди.
Изоҳ (0)