Катта еттилик мамлакатлари етакчилари Украинанинг муҳим инфратузилмасини зудлик билан реконструкция қилиш зарурлигини эълон қилди. Улар молиялаштириш манбаси сифатида санкциялар сабаб хорижда музлатилган Россия активларидан фойдаланишни ҳам қайд этди.
G7 Украина ҳукумати томонидан ишлаб чиқилган реконструкция режасини қўллаб-қувватлашга тайёрлигини таъкидлади. «Биз, шунингдек, Украинанинг гуманитар эҳтиёжларини қондириш, уни эрта тиклаш ва реконструкция қилиш учун, жумладан, музлатиб қўйилган Россия активларидан миллий қонунчилигимизга мувофиқ фойдаланишни ҳам кўриб чиқамиз», — дейилади G7 баёнотида.
Россия Федерацияси Молия вазирлиги март ойида Россиянинг хорижда музлатилган захираларининг умумий миқдори 300 миллиард долларни ташкил этишини маълум қилганди. Украинага ёрдам бериш учун Россия активларини мусодара қилиш таклифи Европа дипломатияси раҳбари Хосеп Боррел томонидан илгари сурилди. Европа Комиссияси Россия активларини мусодара қилиш улар ҳибсга олинган мамлакат қонунларига мувофиқ ҳал қилинишини айтди. Европарламент эса июнь ойида Россия активларини мусодара қилиш механизмини ишлаб чиқишни таклиф қилди. Украина президенти Владимир Зеленский ҳам ўз мамлакати фойдасига Россия активларини мусодара қилиш бўйича халқаро шартнома имзолашни таклиф қилди.
Изоҳ (0)