Музлатилган Россия активларининг Украина фойдасига мусодара қилиниши Европани заифлаштириши мумкин. Бу ҳақда Франция президенти Эммануэл Макрон Чехия президенти Петр Павел билан учрашув якунлари бўйича матбуот анжуманида маълум қилди.
“Биз халқаро ҳуқуққа зид бўлган ҳаракатларни қўллаб-қувватламаймиз ва бундай муҳокамаларнинг бошланиши, менимча, бу активлар жойлашган Европани заифлаштиради”, — деди Франция раҳбари.
Макрон барча масалаларда қонун устуворлиги ҳимоя қилиниши кераклигини таъкидлади.
4 март куни Euractiv манбаларига таяниб, Еврокомиссия икки ҳафта ичида музлатилган Россия активларидан фойдаланиш бўйича расмий сценарийни тақдим этиши ҳақида хабар берди.
Италия бош вазири Жоржа Мелони 3 март куни Украинанинг Россия томонидан музлатилган активлари ҳисобига тикланишини “фалсафий жиҳатдан тўғри” деб билишини айтди. Бироқ у мазкур жараёндаги қонун билан боғлиқ қийинчиликларни тан олди.
Украинада ҳарбий ҳаракатлар бошланганидан кейин Россия Марказий банкининг тахминан 260 миллиард евро (282 миллиард доллар) миқдоридаги активлари музлатиб қўйилди. Тахминан 191 миллиард евро (207 миллиард доллар) Euroclear депозитари томонидан музлатилган. 2023 йил охирида музлатилган активлардан 4,4 миллиард евро даромад олинди.
Изоҳ (0)