Озарбайжоннинг Нафталан шаҳридаги санаторийларнинг бирида 37 ёшли ўзбекистонлик эркак вафот этди. Бу ҳақда Minval.аз нашри хабар бермоқда.
Озарбайжон оммавий ахборот воситалари тарқатган маълумотларга кўра, эркакнинг жонсиз танаси санаторий ходимлари томонидан унинг хонасидан топилган. Тезкор чоралар натижасида марҳум 1988 йилда туғилган З. Кафоров экани аниқланди. Аниқланишича, эркак Озарбайжонга соғломлаштириш муолажаларини олиш учун борган бўлган.
Маълум қилинишича, ҳодиса жойига шифокорлар ва тезкор-тергов гуруҳи чақирилган. Дастлабки кўрик хулосаларига кўра, ўлим ўткир юрак етишмовчилиги туфайли юз берган. Ўлимнинг аниқ сабабини аниқлаш ва барча тафсилотларни ойдинлаштириш мақсадида тергов доирасида суд-тиббий экспертиза тайинланган.
Таъкидланишича, дипломатик каналлар орқали марҳумнинг қариндошларини хабардор қилиш ва жасадни ватанга қайтариш билан боғлиқ кейинги жараёнларни ташкил этиш ишлари амалга оширилиши кутилмоқда.
Нафталан — Озарбайжоннинг республика бўйсунувчи — курорт шаҳри ҳисобланади. Шаҳардан шифобахш хусусиятлари жиҳатидан ноёб бўлган нафталан нефти қазиб олинади. Нафталан конидан олинадиган нефть даволаш мақсадларида қўлланиладиган дунёдаги ягона нефть ҳисобланади. Таркибида нафтенли углеводородлар кўп бўлгани учун ёнмайди ва ёқилғи сифатида ишлатилмайди. Нафталан ванналарини қабул қилиш пайтида чекиш қатъиян ман этилади, гарчи нефтнинг ўзи оддий нефтдек ёниб кетмаса-да, бу хавфли бўлиши мумкин.
7 июль Туркияда ўзбекистонлик официант аёл отишмада бошига ўқ тегиб, ҳалок бўлгани хабар қилинганди.
Изоҳ (0)