Хакерлар Аргентина парламентининг юқори палатасига киберҳужум уюштирди. Бу ҳақда мамлакат Сенати матбуот хизмати Twitter’даги саҳифаси орқали маълум қилди.
«12 январь куни маҳаллий вақт билан соат 04:00 да Сенат хакерлар ҳужумига учради. Товламачи дастур ёрдамида амалга оширилган бу каби ҳужумга сўнгги ойларда турли давлат органлар, суд ҳокимияти ва йирик компаниялар учраган», — дейилади хабарда.
Матбуот хизматининг маълумотларига кўра, хакерлар умумий фойдаланишда бўлган маълумотларни қўлга кирита олган, холос. «Айни вақтда муҳим маълумотларнинг катта қисми қайта тикланди ва сезгир қурилмалар изоляция қилинди, бу бизга ишни яқин вақтларда қайта тиклашга ёрдам беради», — дея маълум қилади матбуот хизмати.
La Nacion газетаси маълумотларига кўра, хакерлик ҳужуми парламент юқори палатаси биносидаги видеокузатув тизимларига ҳам таъсир кўрсатган.
Аввалроқ хакерлар Украина ҳукумати ва алоҳида вазирликлар сайтларига ҳужум уюштиргани тўғрисида хабар берилганди. Бир нечта вазирликлар сайтида, жумладан, ТИВ сайтига ҳам хакерлар бир хил — украин, поляк ва рус тилларида ёзилган мурожаатини қолдирган. Унда қайд этилишича, Украинанинг барча аҳолисини шахсий маълумотлари «умумий тармоққа юкланган», компьютердаги маълумот эса «ўчирилмоқда ва уни қайта тиклаб бўлмайди».
Изоҳ (0)