Дунёда ҳар куни 2,2 мингдан ортиқ киберҳужум содир бўлади ва уларнинг сони ҳар йили 80 фоизга ошади.
Бу ҳақда БМТ ихтисослашган агентлиги – Халқаро электралоқа иттифоқи (ХЭИ) бош котиби Дорин Богдан Мартин Женевада бўлиб ўтган брифингда маълум қилди.
“Ҳар куни 2200 дан ортиқ киберҳужум содир бўладиган дунёда биз ўзимизни хавфсиз ҳис қилолмаймиз”, — деди у.
Богдан Мартин бу “ўсиб бораётган муаммо” эканлигини ва ХЭИ бу муаммога дуч келаётган мамлакатларга кўмакни ошираётганини таъкидлаб, “Бу рақам йилдан йилга 80 фоизга ўсиб бормоқда”, — дея қўшимча қилди.
Ташкилот ахборот ва коммуникация технологиялари (АКТ) соҳасида “уларга сиёсат ва стратегияларни ишлаб чиқишда ёрдам бериш” учун мамлакатлар билан бевосита ҳамкорлик қилади. Ҳозир 100 дан ортиқ давлатлар шундай стратегияга эга, дея хулоса қилди ХЭИ бош котиби.
Халқаро электралоқа иттифоқи БМТнинг АКТ соҳасидаги ихтисослашган агентлиги бўлиб, қароргоҳи Женевада жойлашган. 1865 йилда ташкил этилган ХЭИ глобал радио спектри ва сунъий йўлдош орбиталарини бошқаради, тармоқнинг ўзаро ишлаши учун техник стандартларни ишлаб чиқади ва бутун дунё бўйлаб АКТдан фойдаланишни тарғиб қилади.
Иттифоққа 193 та давлат, шунингдек, 900 га яқин компания, университетлар, халқаро ва минтақавий ташкилотлар аъзодир.
Изоҳ (0)