Ўзбекистонда 2024 йил 1-чорак ҳолатига кўра мониторинг жараёнида давлат органлари ва ташкилотларнинг 19 та веб-ресурсларида 70 та заифлик ва камчиликлар аниқланиб, бартараф этилди. Бу ҳақда “Киберхавфсизлик маркази” ДУК хабар берди.
Қайд этилишича, ушбу вақт мобайнида интернет тармоғининг миллий сегментида 3 миллион 290 мингдан ортиқ киберҳужумлар кузатилган.
Кибермаконда мавжуд заифликлар ва таҳдидлар тўғрисидаги маълумотларни аниқлаш, тўплаш ва уларни бартараф этиш бўйича чора кўриш мақсадида, марказнинг мониторинг тизимлари орқали давлат органлари ва бошқа ташкилотларнинг ахборот инфратузилмаларида аниқланган 369 минг 660 дан ортиқ кибертаҳдидлар бўйича маълумотлар тегишли ташкилотларга тақдим этилган.
Ўз ўрнида киберхавфсизлик талабларига риоя этилмагани сабабли сўнгги 3 ой мобайнида UZ домен зонасида жойлашган 45 та веб-сайтда киберхавфсизлик ҳодисаси аниқланди. Шулардан, 12 таси давлат органларига қолган 33 таси хусусий секторга тегишлидир, — дейилади хабарда.
Эслатиб ўтамиз, Олий Мажлис Сенати сайти 2022 йил 2 ноябрь куни хакерлар ҳужумига учраган эди. Ушбу ҳолат юзасидан олиб борилган терговга қадар текширув вақтида аниқланишича, 2022 йилнинг сентябридан бошлаб Норин тумани Улуғбек кўчасида яшовчи, вояга етмаган 16 ёшли М.Б. бошқалар билан олдиндан ўзаро жиноий тил бириктириб, бир гуруҳ бўлиб, интернет ижтимоий тармоғи орқали киберҳужум уюштиришга оид материалларни кўриб, ушбу йўналишда ноқонуний хатти-ҳаракатларни ўзлаштириб олиб, 2 ноябрь куни Олий мажлис Сенатига тегишли бўлган “www.senat.uz” веб-сайтига ҳамда бошқа сайтларга ноқонуний киберҳужумлар амалга оширганди.
Изоҳ (0)