Вашингтон ва Лондон Киевни Москвадан уюштирилиши мумкин бўлган ҳужумларга тайёрлаш учун Украинага яширин равишда киберхавфсизлик бўйича мутахассисларни юборган. Бу ҳақда The New York Times газетаси манбаларга таяниб хабар берди.
АҚШ ва Буюк Британияда Россия Украинанинг электр тармоқлари, банк тизими ҳамда «Украина иқтисодиёти ва ҳукуматининг бошқа муҳим объектларига» киберҳужумлар уюштириши мумкин, деган қарашлар мавжуд. АҚШ разведкасига кўра, Россиянинг мақсади — Украина президенти Владимир Зеленскийни «қобилиятсиз ва ҳимоясиз» сиёсатчи сифатида кўрсатиш ва эҳтимол, босқинчилик учун шуни баҳона қилиш.
Бундай ҳужумларнинг бўлиши эҳтимолдан йироқ эмас, чунки Украина электр тармоқлари совет даврида қурилган, кейин эса Россия ускуналари билан модернизация қилинган, деб тушунтирди NYT манбалари. Тахминларга кўра, россиялик хакерлар Украина тизимлари қандай ишлашини билади, шунингдек, ички маълумотларни олиб турган бўлиши ҳам мумкин.
Нашр суҳбатдошларининг сўзларига кўра, агар Россия киберҳужум қилишга қарор қилса, бу катта эҳтимол билан Рождество байрамидан кейин январь ойининг биринчи ҳафтаси охирида содир бўлади.
Украинага мутахассислар юборилгани ҳақидаги маълумотга иккала давлатдан ҳам расмий изоҳ берилмаган. АҚШ президенти Жо Байден маъмурияти «Украинанинг кибермудофаа тизимини мустаҳкамлаш борасидаги саъй-ҳаракатларини анчадан буён қўллаб-қувватлаб келаётганини» айтган. Британия ҳукумати эса Лондон ва унинг иттифоқчилари томонидан Киевга кўрсатилаётган ёрдам мудофаа характерига эга эканини билдирган.
NYT манбалари, ўз навбатида АҚШнинг Украинада кибермудофаа кучларини, жумладан, АҚШ Киберқўмондонлиги ресурсларини кенгроқ миқёсда жойлаштириш имкониятини кўриб чиқаётганини таъкидламоқда.
Эслатиб ўтамиз, Россия қўшинларининг Украина билан чегарада тўпланаётгани ҳақида маълумотлар 2021 йилнинг кузида пайдо бўлишни бошлади. Ғарб ОАВ манбаларига кўра, Украинага ҳужумда 100-175 минг россиялик аскар иштирок этиши мумкин. Кремль бу хабарларни «қуруқ, асоссиз ҳолда кескинликни кучайтириш» деб атади. АҚШ расмийларининг фикрича, Россия президенти Владимир Путин Украинага бостириб кириш тўғрисида ҳали қарор қабул қилмаган.
Бу орада Европада хавфсизлик кафолатлари бўйича музокаралар бошланди. Россия Ташқи ишлар вазирлиги АҚШ ва НАТО билан келишув лойиҳаларини эълон қилди. Россия томони бошқа нарсалар қатори НАТОга Украинани альянсга қўшилишдан четлаштиришни, шунингдек, Шарқий Европа ва Марказий Осиёда ҳар қандай ҳарбий фаолиятдан воз кечишни таклиф қилди. АҚШ Россиянинг таклифларини кўриб чиққанини, аммо Европа давлатларининг иштирокисиз уларни муҳокама қилмоқчи эмаслигини маълум қилди.
Изоҳ (0)