Самарқанд туманида «Музлатгич омборларида мева-сабзавот маҳсулотларини сақлаш: бугунги ҳолат ва соҳани ривожлантириш истиқболлари» мавзусида семинар бўлиб ўтди. Бу ҳақда ЎзА хабар бермоқда.
Қишлоқ ва сув хўжалиги вазирлиги ҳамда АҚШ халқаро тараққиёт агентлигининг (USAID) мамлакатдаги ваколатхонаси томонидан «Қишлоқ хўжалигида қиймат занжирини ривожлантириш» лойиҳаси доирасида ташкил этилган тадбирда мева-сабзавот етиштирувчи, уларни сақлайдиган ва қайта ишлайдиган фермерлар, тадбиркорлар, экспортёрлар, транспорт хизмати кўрсатувчилар ва савдо тармоқлари вакиллари иштирок этди.
Семинарда қишлоқ хўжалиги соҳасида амалга оширилаётган ислоҳотлар жараёнида боғдорчилик, мева-сабзавотчилик ва узумчиликни ривожлантиришга алоҳида эътибор қаратилаётгани таъкидланди. Соҳага замонавий илғор технологиялар жорий этилаётгани ҳосилдорликнинг ошиши ва халқаро стандартларга мос маҳсулот ишлаб чиқаришга хизмат қилмоқда.
«Мева-сабзавот, узум маҳсулотлари етиштиришдаги жадал ўсиш юртимизда музлатгич омборлари тармоғининг кенгайишига ҳам туртки берди, — дейди АҚШ халқаро тараққиёт агентлиги лойиҳаси мутахассиси М. Исомиддинов. — 2011 йилгача мамлакатимизда 60 минг тоннага яқин маҳсулот шундай омборхоналарда сақланган бўлса, бугунга келиб бу миқдор 1 миллион 150 минг тоннага етди. Дунёда музлатгичлар ривожини кузатиш ва ривожлантириш ташкилотининг 2016 йилги ҳисоботига кўра, Ўзбекистон музлатгичлар қуввати бўйича етакчи 20 таликдан ўрин олди. Бозор ривожланиш индексида эса мамлакатимиз дунё бўйича энг юқори кўрсаткич (219 фоиз) ни қайд этган. Бугунги кунда ушбу соҳада жадал иш олиб борилаётган Шимолий Африка, Хитой ва Туркияда ҳам бу кўрсаткич 30 фоиздан ошмаган».
Семинарда лойиҳа мутахассислари томонидан мева-сабзавот маҳсулотларини сифатли сақлаш, саралаш, қадоқлаш ва ташишда кенг қўлланилаётган усуллар, экспорт тартиб-қоидалари ҳақида батафсил маълумот берилди. Турли тақдимотлар ўтказилди. Ўз навбатида, иштирокчилар маҳсулотни сақлаш ва экспортга чиқариш билан боғлиқ масалалар юзасидан тажриба алмашди, ҳамкорликда ишлаш бўйича таклифлар билдирилди.
Изоҳ (0)