Ўзбекистоннинг Италиядаги элчиси Отабек Акбаров ва БМТнинг Қишлоқ хўжалигини ривожлантириш халқаро жамғармасининг (IFAD) Яқин Шарқ, Шимолий Африка, Европа ва Марказий Осиё бўйича минтақавий директори Дина Салех ўртасида учрашув бўлиб ўтди. Бу ҳақда “Дунё” агентлиги хабар берди.
Қайд этилишича, мулоқотда сўнгги йилларда ўзаро муносабатларнинг жадал суръатларда ривожланаётгани, 2023 йилнинг бошида жамғарма томонидан Ўзбекистон учун умумий қиймати 600 миллион доллар бўлган 5 йиллик мамлакат стратегияси қабул қилингани, шунингдек, жамғарманинг Тошкентда ваколатхонаси очилиши тўғрисидаги қарори муҳим қадам бўлгани таъкидланган.
Учрашувда Дина Салех жамғарма томонидан янги тайинланган Ўзбекистон билан мулоқот бўйича директори Лаура Маттиолини таништириб, унинг халқаро ташкилотлардаги бой тажрибаси билан мамлакат қишлоқ хўжалигида амалга оширилаётган изчил ислоҳотларга муносиб ҳисса қўшишига ишонч билдирган.
Лаура Маттиоли сентябрь ойида ўз лавозимига киришиши ҳамда жамғарманинг Ўзбекистондаги инвестиция портфелини муваффақиятли амалга ошириш ва уни янада кенгайтиришга тайёрлиги маълум қилинди.
Учрашувда мамлакатда мева-сабзавотчилик ва чорвачилик тармоғида амалга оширилаётган лойиҳаларнинг бугунги ҳолати тўғрисида фикр алмашилган. Ушбу лойиҳалар деҳқон ва фермер хўжаликларида маҳсулот етиштиришни кўпайтиришга ва уларнинг даромадини янада оширишга кўмак бераётгани таъкидланган.
БМТ Қишлоқ хўжалигини ривожлантириш халқаро жамғармаси 1977 йилда Римда ташкил топган бўлиб, унинг асосий мақсади ривожланаётган мамлакатларда деҳқон ва оилавий хўжаликларни қўллаб-қувватлашдан иборат. Жамғармага 178 та давлат аъзо, унинг дунё бўйлаб 40 дан ортиқ ваколатхоналари мавжуд. Ўзбекистон мазкур халқаро молия институтига 2011 йилда аъзо бўлган.
Август охирларида Девид Хофман АҚШ Халқаро тараққиёт агентлигининг (USAID) Ўзбекистондаги миссиясининг янги раҳбари этиб тайинлангани тўғрисида хабар берилганди.
Изоҳ (0)