Тарихчилар Исо пайғамбарнинг биринчи мўжизаси — сувни шаробга айлантирган ҳудудни топганини маълум қилди. Бу ҳақда Fox News хабар берди.
Исо пайғамбарнинг Канада содир этган илк мўжизаси ҳақида Библияда оз маълумот берилган. У қишлоқдаги тўй маросимида сувни шаробга айлантирган.
Энг кенг тарқалган назарияга кўра, Исроилдаги Кафр Канна шаҳарчаси аслида Библияда тилга олинган Канаа шаҳри бўлган. 1914 йилги католик энциклопедиясига кўра, зиёратчилар бу жойни қадимдан муқаддас деб билган.
Аммо тарихчи Том Макколлоу Кана аслида Кафр Каннанинг (ёки Хирбет Қана) шимолидан беш мил узоқликда жойлашганини айтмоқда. Хирбет Қана деб номланган ҳудуд милоддан аввалги 323 йилдан милодий 324 йилгача яҳудийлар қишлоғи бўлган.
Макколлоу 2017 йилда нафақага чиққунга қадар Centre коллежида дин ва тарихдан дарс берган. У айнан Хирбет Қанада Исо пайғамбар сувни шаробга айлантирганини таъкидлаган.
“Бошқа ҳеч бир жой Хирбет Қаначалик ишончли далилларга эга эмас”, деган олим.
Асосий далил христианлар томонидан фойдаланилган туннеллар ҳисобланади. Бу ер Исо пайғамбар билан боғлиқ турли ҳикояларда тилга олинган.
“Насроний зиёратчилар сув ва шароб мўжизасини эъзозлаш учун келадиган ғорни топишга муваффақ бўлдик. Бу мажмуа V аср охири ёки VI аср бошларидан бошлаб XII аср салибчилар давригача зиёратчилар томонидан фойдаланилган”, дейди олим.
Қазишмалар пайтида меҳроб ва тош идишли жавон ҳам топилган. Олимнинг таъкидлашича, Библияда тилга олинган олтита тош хумга ўхшаш бешта хумнинг ўрни ҳам аниқланган. Қазишмалар натижасида ғор деворларида Кйириэ Иэсоу, Коине юнонча ибораси, яъни Исо маъносини англатадиган ёзувлар ҳам топилган.
Шунингдек, Макколлоу ўз фикрини қўллаб-қувватлаш учун биринчи аср яҳудий тарихчиси Флавий Иосифнинг асаридан фойдаланган.
“Муаллифнинг келтирган маълумотлари географик жиҳатдан Хирбет Қана жойлашган ҳудудга тўғри келади. Юҳанно Хушхабари учун Қана қайсидир маънода Исо пайғамбарнинг хавфсиз жойи ёки фаолият маркази бўлган. У ва унинг шогирдлари Яҳудияда қаршиликка дуч келганларида, айнан ўша жойга борган”, дейди у.
Изоҳ (0)