Сурхондарёда 4 та археология ёдгорлигига 7 миллиард сўмлик зарар етказилгани аниқланиб, жиноят иши қўзғатилди. Бу ҳақда Бош прокуратура матбуот хизмати хабар берди.
Маълум қилинишича, прокуратура органлари томонидан Маданий мерос агентлиги билан ҳамкорликда тарихий ёдгорликларни муҳофаза қилишга қаратилган тизимли назорат тадбирлари ўтказиб келинмоқда. Шундай тадбирларнинг бирида Сурхондарё вилоятининг Шеробод туманида 4 та археология ёдгорлигига зарар етказилгани аниқланди.
Хусусан:
- милоддан аввалги V–I асрларга оид “Таллаган тепа” ёдгорлигининг 40 квадрат метр қисми кесиб олиниб, автомобиль йўли ўтказилиши оқибатида 888 милион сўмлик;
- V–VIII асрларга оид “Ғўринтепа” ёдгорлигининг 200 квадрат метр қисми бузилиб, уй-жойлар қуриб юборилиши оқибатида 4,7 миллиард сўмлик;
- I–IV асрларга оид “Хушвақтепа” ёдгорлиги тупроғи 12 квадрат метри олиниб, ҳожатхона қурилгани оқибатида 266 миллион сўмлик;
- V–VII асрларга оид “Тоштепа” ёдгорлигининг 56 квадрат метр тупроқлари олиниб, молхона қурилгани оқибатида 1,2 миллиард сўмлик зарар етказилган.
Аниқланган ҳолат юзасидан туман ҳокимлиги мансабдор шахслари ва бошқаларга нисбатан жиноят иши қўзғатилиб, дастлабки тергов ҳаракатлари олиб борилмоқда.
Август ойида ҳам вилоятдаги археологик ёдгорликлар тупроғидан молхолан, ҳожатхона қурилгани аниқланганди.
Изоҳ (0)