Британиялик археологлар милоддан аввалги III асрга тегишли бир нечта қабрни топди. Уларнинг ичида жумбоқли ҳолатда дафн қилинган одамларнинг қолдиқлари топилган. Бу ҳақда Gizmodo хабар берди.
Қабрлардан бирида 17—25 ёш оралиғидаги йигитнинг жасади бўлган. У жангчи бўлган, бироқ олимларнинг фикрича, унинг ўлими табиий сабаблар билан юз берган. Қолдиқларни кўздан кечириш чоғида бешта темир ва тўртта суяк учли найзалар санчилгани аниқланган. Унинг бош суягига эса ўтмас қурол билан кучли зарба берилган. Археологларнинг фикрича, бу маросим жангчига муносиб деб ҳисобланган иккинчи ўлимни рамзлантиради. Бошқа назарияга кўра, одамлар ўликнинг қайта тирилишидан қўрққан, найзалар эса бунинг олдини олиши керак бўлган.
Иккинчи қабрда эса 60—70 ёшли қариянинг жасади топилган. У иккита отга уланган аравада кўмилган. Олимларнинг фикрича, дастлаб ҳайвонлар ҳаракатлана олмаслиги учун ярмигача кўмилган, кейин эса боши олиб ташланган. Кесиб ташланган бошлар марҳумни ҳимоя қилиши учун қабрга қўйилган. Эркак эмбрион позасида жойлаштирилган. Шунингдек, қабрга қурол-аслаҳа ва бошқа керакли нарсалар ҳам қўйилган.
Изоҳ (0)