Жиззах вилоятида палеолит ва неолит даврларига оид янги археологик масканлар аниқланди, деб хабар берди Маданий мерос агентлиги.
Маълум қилинишича, 28 апрелдан 6 майгача Ғаллаорол туманида жойлашган Нурота тоғ тизмасининг шимоли-ғарбий қисмида дала тадқиқот-қидирув ишлари олиб борилган.
Тадқиқотлар жараёнида тарихий аҳамиятга эга қатор археологик манзиллар аниқланди. Жумладан, Ўгат қишлоғининг ғарбий қисмида сўнгги палеолит даврига оид ибтидоий кишиларнинг яшаш макони қайд этилган. Изланишларнинг дастлабки таҳлиллари бу ҳудудда минг йиллар аввал инсонлар доимий ёки мавсумий истиқомат қилганини кўрсатган.
Қоропчи қишлоғининг шимолий этакларида эса неолит даврига мансуб иккита янги макон аниқланди. Топилган манзиллар инсониятнинг деҳқончилик ва чорвачиликка ўтиш даврига оид муҳим маълумотларни ўз ичига олади.
Ёнбоштут қишлоғи шимолида жойлашган “Бешбулоқ” номли макон ҳам неолит даврига тегишли бўлиб, бу ерда қадимги жамиятларнинг ижтимоий ва маданий ҳаётига доир излар топилган.
Мазкур археологик топилмалар Ўзбекистон ҳудудида энг ибтидоий одамларнинг яшаш тарихини ўрганишда муҳим қадам бўлиб хизмат қилади. Тадқиқотлар ҳозирги кунда ҳам давом эттирилмоқда. Келгусида топилмаларнинг илмий таҳлиллари асосида каталоглар, мақолалар ва кўргазмалар тайёрланиши режалаштирилган, дейилади хабарда.
Ичанқалъада қадимий қудуқ топилгани ва унинг ёши 150 да экани тахмин қилинаётгани, Қўқондаги Жоме мажмуасида қадимий тангалар топилгани, шунингдек, “Дастурхончи” мадрасасини таъмирлаш ишлари вақтида ҳам қадимги топилмалар — кўзалар топилгани тўғрисида хабар берилган эди.
Изоҳ (0)