Кўпинча воқеаларни олдиндан башорат қиладиган Голливуднинг таниқли инсайдери Жефф Снайдер Pixar машҳур “Рататуй” мультфильмининг давомини ишлаб чиқаётганини маълум қилди. Яқиндагина студия буни инкор этган эди. Унинг айтишича, анимациянинг давоми дастлабки босқичда ва асл фильмнинг режиссёри Бред Берд ишда қатнашадими ёки йўқми, ҳозирча номаълум.
Биринчи қисм чиққанидан буён 18 йил ўтди ва кўпчилик ҳали ҳам уни студиянинг энг сара асарларидан бири деб ҳисоблайди. Ажойиб ҳид билиш ва таъм сезиш қобилияти туфайли ноёб ошпазлик истеъдодига эга бўлган сичқонча Реми ҳақидаги ҳикоя томошабинлар қалбини забт этган эди. 2007 йилда мультфильм жаҳон прокат бозорида 620 миллион доллардан ортиқ маблағ тўплаган.
Бу янгилик Pixar’нинг давомли фильмлар яратиш тенденцияси кучайиб бораётганини тасдиқлайди. “Бошқотирма 2” ўтган йили 1,7 миллиард доллардан ортиқ даромад билан жаҳон прокатининг етакчисига айланди. Кейинги йилларда “Ўйинчоқлар тарихи 5“, “Супер оила 3”, ва “Коко сири 2” фильмлари чиқарилади. Студиянинг сўнгги оригинал лойиҳаси “Элио”нинг муваффақиятсизлиги унинг синовдан ўтган ҳитларга қайтиш йўналишини янада мустаҳкамлайди. World of Reel муаллифи таъкидлаганидек, кўринишидан, студиянинг келажаги ўтмишга боғлиқ бўлиб қолмоқда.
Изоҳ (0)