Бу актрисалар машҳур Disney қаҳрамонларига ўз овозларини инъом этишган, аммо уларнинг кимлигини ва ташқи кўриниши қандай бўлганини кўпчилик билмайди. Айнан уларнинг овози мафтункор образларни яратишда катта ҳисса қўшган. Қуйида Disney’нинг 3 машҳур образига овоз берган актрисалар ҳақида бўлишдик.
Эйлин Вудс — Золушка
Асл исми Жаклин Рут Вудс бўлган актриса Голливудда машҳур бўлишни орзу қилмаган, бироқ онаси қизининг юлдуз бўлишига ишончи комил эди. Шундай қилиб, қизча аввал маҳаллий радиода ишлай бошлади, кейин эса оркестр билан гастролларда қатнашди. 1950 йилда экранга чиққан мультфильмда, Золушкага овоз бериш учун ўтказилган кастингда Uolt Disney’нинг ўзи 400 нафар номзод орасидан ёқимли овозли актрисани танлади. Кейинчалик у Вудс ижросидаги Золушка ўзининг энг севимли аёл қаҳрамони эканини эътироф этди. Актриса 2010 йилда қариялар уйида 81 ёшида вафот этди.
Жоди Бенсон — Сув париси
Актрисага шуҳратни айнан чизилган қаҳрамонлар келтирди. 1989 йилги анимацион фильм Сув парисидан ташқари, у “Ўйинчоқлар тарихи 2” фильмидаги Барбига ва “Леди ва Дайди 2” фильмидаги Ледига, шунингдек, 1994 йилда Дюймовочка мультфильмига ҳамда бошқа кўплаб персонажларга овоз берган. Актрисанинг ҳиссасини Холли Бэйли иштирокидаги “Сув париси”нинг янги фильмида ҳам эътироф этишга қарор қилишди — Жоди эпизодик роллардан бирига таклиф этилди.
Пейж O’Хара — Белл
Актриса Disney ижодининг ашаддий мухлиси бўлгани учун, газетада кастинг ҳақидаги эълонни ўқиши биланоқ, синовдан ўтишга қарор қилди. Омад унга кулиб боқди — айнан у 1991 йилдаги “Соҳибжамол ва Махлуқ” номли машҳур мультфильмда бош қаҳрамонга овоз берди. Унинг овози Белл образига шунчалик мос келардики, 35 ёшли актрисанинг 17 ёшли қаҳрамонга овоз бераётгани мультфильмда умуман сезилмаганди. Ушбу лойиҳадаги муваффақиятдан сўнг уни кўп йиллар давомида бошқа анимацион лойиҳаларга ҳам овоз бериш учун таклиф қилишган.
Изоҳ (0)