Disney маликаларини кўпинча болалар тарбиясига ёмон таъсир қилишда айблашади: улар гендер стереотипларини қўллаб-қувватлайди, қизнинг бели қандай бўлиши кераклиги ҳақида нотўғри фикрлар беради ва ҳоказо. Аммо мультфильмдаги баъзи нарсалар чиндан ҳам реал ҳаётга тўғри келмайди.
Элза
«Музюрак» мультфильмида малика Элза — бўлажак тахт вориси — сеҳрли кучга эга, лекин уни қандай бошқаришни билмайди. Баъзи сабабларга кўра, унинг ота-онаси унга кучини бошқаришни ўргатиш ёки ҳеч бўлмаганда бунинг учун жодугарни таклиф қилиш ўрнига уни бутун дунёдан ажратишга қарор қилишади.
Натижада тож кийиш пайтида Элза на сеҳрни, на ўз ҳис-туйғуларини назорат қила олмайдиган қиз бўлиб қолади — ёш малика ўз мамлакатини музлатиб қўяди ва тоғларга қочиб кетади. Энг қизиғи шу ердан бошланади: у дарҳол муздан улкан қаср қуради, баҳайбат қўриқчилар яратади ва ҳатто либосини ўзгартиради. У буларни қаердан ўрганган? Агар Элзанинг сеҳри фақат қор ва музга тааллуқли бўлса, унинг либоси нимадан тикилган?
Рапунзел
Эҳтимол, Рапунзел энг сирли малика бўлса керак. У бутун умрини минорага қамалиб ўтказади, шунинг учун ҳам қизнинг уйда ялангоёқ юргани мантиқан тўғри. Бироқ Рапунзел ялангоёқ ҳолда кўчада ҳам шундай тез югуради, ўткир тош ёки йиқилиши мумкинлигига парво ҳам қилмайди. Афтидан, қиз ҳайратланарли даражада омадли ёки оғриққа жуда чидамли бўлса керак.
Рапунзелнинг яна бир ғалати жиҳати — унинг сочлари. Ёйилган ҳолда унинг узунлиги 20 метрдан ошади, аммо йиғилганда ҳатто ерга ҳам тегмайди. Қизнинг бўйи тахминан 164 см бўлишига қарамай, ўрилган сочларининг узунлиги 1,5 м дан бироз ошади, холос.
Тиана
Тиана Навинни ўпади ва қурбақага айланиб қолади. Аммо унинг дугонаси Шарлотта сеҳрланган шаҳзодани бир неча марта ўпади, лекин негадир қурбақага айланмайди.
Белл
Белл ҳам барча Disney маликалари сингари жуда нозик қиз. Унинг ҳеч қандай сеҳрли қудрати йўқ. Аммо у бўрилар билан жангда яраланган улкан махлуқни кўтариб, отга миндиради. Дарвоқе, от ҳам шундай оғирликни кўтара олгани билан томошабинни ҳайратга солади.
Золушка
Эртакда айтилишича, Золушка уй ишларининг барчасини ўз зиммасига олган камбағал қиз. Аммо мультфильмда у деярли иш қилмайди: сичқонлар ва қушлар унинг учун ҳаммасини қилади. Айтганча, улар шаҳзода билан учрашиш учун Золушкага омбордан қочишга ҳам ёрдам беришади. Қасрдаги балга қизни тайёрлаш ҳам парининг зиммасига тушади. Золушканинг ўзи эса бахтга эришиш учун фақат биллур туфлисини йўқотади, холос.
Ариэл
Мультфильмда кичкина сув париси Ариэл ўз овозини юриш қобилиятига алмаштиради. Шунинг учун у шаҳзодага уни қутқарган ўзи эканлигини айтолмайди. Лекин нега у бу ҳақда ёзиб бермаслиги керак? Малика, албатта, саводхон, чунки у жодугар Урсула таклиф қилган шартномани ўқиб, имзолаган.
Покаҳонтас
Ҳиндулар қабиласи оқсоқолининг қизи инглиз тилини билмасди. Бироқ у бувисига тегишли бўлган ва унга маслаҳат берган ички овозни эшитади: «Қалбинг билан тингла». Шундан кейин ҳеч қандай муаммосиз Жон Смитни тушуна бошлайди.
Мерида
Мерида кучли ва мустақил маликалардан бири. У турмушга чиқишни истамайди, от минади ва камондан отади, қиз ҳамма ишларни эркакларсиз ҳам уддасидан чиқади, деган ишончни таъкидлайди. Албатта, қиз ота-онаси уни турмушга чиқишга мажбурлаётганидан ғазабланади, лекин ўз онасини жодугарнинг сеҳри билан заҳарлаш қандайдир ғалати.
Мавзуга доир:
Изоҳ (0)