“Рома” клуби яқинда янги бош мураббий номини эълон қилиши кутилмоқда. Ҳозирда жамоани бошқараётган тажрибали мутахассис Клаудио Ранери мавсум охирида лавозимини тарк этади ва клуб тизимида раҳбарлик вазифасини бажаради.
Ранерининг ўзи берган маълумотга кўра, спорт директори Флоран Гисолфи билан биргаликда янги мураббий излаш жараёнида фаол қатнашган. Улар инглиз модели асосида иш юритиб, дастлабки 7–8 номзод орасидан 3–4 нафар кучли мураббийларни танлаб олишган.
Яқин орада клуб янги мураббий номини расман эълон қилади, деди Ранери.
Айни пайтда “Рома”нинг бўлажак мураббийи сифатида Эрик тен Ҳаг номи тилга олинмоқда. Нидерландиялик мутахассис А Сериянинг 31-туридаги “Рома” — “Ювентус” баҳсини стадионда томоша қилди. У клуб президенти Ден Фридкиннинг шахсий меҳмони сифатида учрашувга ташриф буюргани ҳақида хабарлар тарқалди.
Шу билан бирга, Ранери матбуотда тарқалган миш-мишларга ҳам ўз муносабатини билдирди:
Мен тен Ҳаг билан ҳеч қачон учрашмаганман. Унинг билан овқатланганим ҳақида ёзишди, лекин бу ҳақиқат эмас, деди мутахассис.
Маълумот учун, Тен Ҳагнинг сўнгги иш жойи “Манчестер Юнайтед” ҳисобланади. Мутахассис ёмон натижалар фонида манкунианликлар бошқарувидан истеъфога чиқарилган эди.
Ўзбекистонлик ҳужумчи Элдор Шомуродов 2021 йилдан бери “Рома” сафида ҳаракат қилади. Аввалроқ у клуб билан шартномасини 2027 йилга қадар узайтириши ҳақида хабарлар тарқалган эди.
Изоҳ (0)