Мамлакатда фаолият кўрсатаётган корхона ва ташкилотлар сони бир йил ичида 7 фоизга кўпайди. Бу ҳақда Статистика қўмитаси маълум қилди.
2025 йил 1 июль ҳолатига кўра, республикада фаолият кўрсатаётган корхона ва ташкилотлар сони 463 мингтани ташкил этди. Шундан 393,4 мингтаси (85 фоизи) кичик корхона ва микрофирмалар ҳиссасига тўғри келди.
Таққослаш учун, 2022 йилнинг мос даврида мамлакатда жами 561 386 корхона ва ташкилотлар ишлаган. Уларнинг 497 293 таси кичик бизнес субъектлари бўлган. 2023 йил июлида 477 722 та, 2024 йил мос даврида 455 609 та корхона ва ташкилотлар фаолият юритган.
Жорий йилги кўрсаткичларга кўра, ҳудудлар бўйича энг кўп корхона Тошкент шаҳрида рўйхатга олинган — 103,9 мингта. Шундан 91 916 таси кичик бизнес субъектларидир. Энг кам кўрсаткич эса Сирдарё вилоятида — 12 027 та.
Фаолият йўналишлари бўйича энг кўп корхоналар савдо соҳасида — 32,7 фоиз. Саноат (12,7 фоиз) ва қишлоқ хўжалиги (7,5 фоиз) улуши ҳам катта.
Тижорат ташкилотлари орасида энг кўпи масъулияти чекланган жамиятлар бўлиб, уларнинг сони 306 мингтани ташкил этди. Шунингдек, 48,8 мингта хусусий корхона, 38,2 мингта оилавий корхона ва 649 та акциядорлик жамияти фаолият юритмоқда.
Мамлакатда хорижий инвестицияли корхоналар сони ҳам кўпайган. Бир йил ичида уларнинг сони 2 800 тадан кўпроққа ошган. Энг кўп хорижий корхоналар Хитойга тегишли — 4 192 та. Шу билан бирга, Россия, Туркия, Қозоғистон, Афғонистон ва Жанубий Корея корхоналари улуши ҳам нисбатан катта.
Изоҳ (0)