Анимацион сериаллар ишлаб чиқарила бошлаганига 100 йилдан ошди. Ўтган вақт мобайнида мультфильмлар болалар учун ажойиб шерикка айланиб улгурди. Болалар мультфильм орқали дунё ҳақидаги янги маълумотларни, қандай қилиб тўғри қарор қабул қилишни, қандай дўст танлаш ва хатолардан қўрқмасликни ўрганади. Шунингдек, илгари мультфильмлар фақат болалар учун мўлжалланган бўлса, ҳозирда катталар ҳам уларни завқ билан томоша қилади. Бу орқали бутун оила бирлашади ва камида икки соат дунё ташвишларидан халос бўлади.
«Райя ва сўнгги аждаҳо»
Мультфильмдаги воқеалар Кумандра номли хаёлий мамлакатда бўлиб ўтади. Уруш олиб бораётган 5 қабиладан бирининг етакчисининг қизи Рая ҳам сўнгги аждарни излашга киришади. Аммо аждаҳонинг кучи инсонларга ёрдам бериш учун камлик қилади. Одамлар қачонки бир-бирлари билан бирлашгандагина сеҳрли тошни фаоллаштиришни ва ўз ерларини сақлаб қолишлари мумкин бўлади. Мультфильмда, асосан, тарқоқлик мавзуси кўтарилган. Қаҳрамон ҳаётда нафақат жасорат, балки одамларга ишониш қобилияти ҳам қадрли эканини тушунади ва умумий манфаат шахсий мақсадлардан устун эканлиги очиб берилади.
«Айнбо. Амазониянинг юраги»
Ёш овчи Айнбо Амазонка ўрмонида ўсган ва у ерга сеҳрли равишда боғланган. Аммо бир куни у ерга ўзга ерликлар бостириб келади. Натижада Айнбо билган ҳар бир одам хавф остида қолади. Ўзининг сюжети билан мультфильм атроф-муҳит муаммолари ва ўрмонларни кесишнинг салбий оқибатларига эътибор қаратган. Айнбо бундай вазиятда янада улғаяди ва ўзининг заиф томонларини тан олишни ва уларни бартараф этишни ўрганади.
«Ганзель, Гретель ва сеҳргарлар агентлиги»
Гретель — махфий сеҳрли хавфсизлик бўлимининг тажрибали агенти. Унга жиддий масала — ғойиб бўлган қиролни топиш ишониб топширилган. Қизнинг шериги ўзининг очиқ кўнгиллиги билан машҳур бўлган акаси Ганзелга айланади. Улар биргаликда қиролнинг йўқолиб қолиш сирини ошкор қилиши ва сеҳр ишлатадиган кучли душман билан курашиши керак. Мультфильмда оилавий муносабатлар қадрланади. Характер жиҳатидан фарқ қилувчи ака-сингил охир-оқибат бир-бирининг камчилигини тан олади ва биргаликда ҳаракат қилади.
«Қалб»
Pixar’нинг навбатдаги дурдона асари. 2021 йилда «Энг яхши анимацион фильм» номинацияси бўйича «Оскар»га даъвогарлардан бири бўлган мультфильм жазни ҳаммадан ҳам кўра кўпроқ яхши кўрадиган мусиқа ўқитувчиси Жо Гарднер ҳақида ҳикоя қилади. Мультфильмда умумбашарий муаммолар кўтарилган бўлиб, унда инсон учун мақсадга эришиш қанчалар муҳим, мунтазам нима шуғулланиш ва пул топиш бир умрлик орзу бўлиши керакми, деган саволларга жавоб топиш мумкин.
«Бўрилар ҳақида афсона»
«Оскар» мукофотига яна бир даъвогар Томм Мурнинг мутфильми. Воқеаларга кўра, Робин исмли қиз овчи отаси билан Англиядан Ирландияга кўчиб ўтади. Унга атрофдаги бўриларни йўқ қилиш вазифаси топширилган. Огоҳлантиришларга қарамай, Робин шаҳар ташқарисига чиқиб, бўри-қиз Меб билан танишади. Ушбу асар орқали Робин ва унинг отаси ўзларига ўхшамайдиган мавжудотларни тушунишни ўрганади.
«Кўз ёшларим билан мушукка айланаман»
Япония мактабида таълим оладиган Миё нотаниш одамдан ниқоб олади. Сеҳрли ниқобни тақиши билан мушукка айланиб қолади. У мушук қиёфасида ўзининг севган инсони олдида вақт ўтказади. Аммо ўз ҳолига қайтиши билан ўзини ёлғиз ҳис қила бошлайди. Сўнгра у абадий мушук бўлиб қолишни хоҳлайди, чунки ҳамма мушукларни яхши кўрар эди. Ушбу ҳикоя қандай қилиб инсон ўзида куч топиши ва самимий бўлиб қолишни ўргатади.
«Олға»
Икки эльф биродар — Иэн ва Барли сеҳр ва замонавий технологияга бой дунёда яшайди. Иэн 16 ёшга тўлган кунида онасидан сеҳрли таёқни олади. Буни унга отаси мерос қилиб қолдирган эди. Айнан ушбу сеҳрли таёқ туфайли эльфлар ота-онасини унутишдан қайтишга муваффақ бўлади.
«Ойга саёҳат»
Фей-фей исмли қиз Ернинг сунъий йўлдошига бориш ва у ерда Ой маъбудаси мавжудлигини исботлаш учун ракета ясайди. Қаҳрамон бунда онасининг хотираларидан илҳом олади. Фей-Фей отасини иккинчи марта турмуш қуришга қарор қилгани учун кечира олмайди ва унга абадий севги борлигини исботлашга уринади. Сюжет давомида Фей-Фей ўтмиш билан яшамасликни тушунади. Ой маъбудаси билан учрашгач, абадий муҳаббат ҳам абадий қайғу эканлигини англайди. Шунинг учун ҳаётда янги одамлар кириб келишига имкон яратиш кераклигини билиб олади.
«Крудслар оиласи: янги макон»
Мутфильмда тош асрига оид воқеалар ёритилган. Крудслар оиласи яшаш учун янги ва хавфсиз жой излайди. Мазкур картина 8 йил аввал чиқарилган «Крудслар оиласи» мультфильмининг давоми. У томошабинларга ҳар кимга ҳақли равишда тегишли бўлган табиий бойликларни ҳеч кимнинг якка ўзи тасарруф этишига йўл қўйилмаслигини эслатади.
«Эверест»
Лу исмли мактаб ўқувчиси қор одами билан танишади. У ёвуз олимлар томонидан жойлаштирилган Шанхай лабораториясидан қочган. Қиз қандай бўлмасин янги дўстининг Эверестга қайтишига ёрдам беради. Анимацион сериал давомида инсон оиласи ва дўстларини қўллаб-қувватлаши кераклигини эслатиб туради.
«Узилган занжир»
Табиатшунос Лайонел одамларга турли хил афсонавий мавжудотлар ҳақида маълумот беришни яхши кўради. Шимолий Американинг ўрмонларида Линк исмли шундай мавжудот ҳақида эшитади. Линкка ёрдам бериш мақсадида Лайонел бир қатор дўстлари билан Ҳимолайга саёҳат қилади.
«Келажакдан Мирай»
4 ёшли Кун ота-онасини янги туғилган чақалоқ Мирайдан рашк қилади. Сабаби ҳамманинг эътибори янги туғилган болада эди. Ўзини ёлғиз ҳис қилаётган Кун ҳовлисида ўсаётган сеҳрли дарахтга яширинишни бошлайди. Дарахт шохлари остида келажакни кўради ва у ерда улғайган синглисини учратади. Картина оилада ҳар кимнинг ўз ўрни бор эканлиги ва фарзандлар ҳамиша ота-она учун қадрли эканини намойиш этади.
Изоҳ (0)