Ўзбекистон Марказий банки Исломий молиявий хизматлар кенгашига аъзо бўлди. Бу ҳақда банк матбуот хизмати хабар берди.
Кенгаш фаолияти исломий молия институтларини тартибга солиш ва назорат қилиш бўйича халқаро стандартларни ишлаб чиқиш, самарали корпоратив бошқарув механизмлари ва риск-менежмент тизимини жорий қилиш, шунингдек, мазкур соҳада кадрлар салоҳиятини ошириш, тадқиқотлар олиб бориш ҳамда ушбу масалаларда кенгашга аъзо ташкилотларга кўмаклашишга қаратилган.
Хабарда таъкидланишича, мазкур ташкилотга аъзолик бошқа мамлакатлар тажрибасини ўрганиш ва Ўзбекистонда исломий молия институтлари фаолиятини тартибга солиш ва назорат қилиш соҳасида илғор халқаро тажрибани жорий этиш имконини беради.
Исломий молиявий хизматлар кенгаши 2002 йилда ташкил этилган бўлиб, бош офиси Куала-Лумпурда (Малайзия) жойлашган. Бугунги кунда кенгашнинг 188 аъзоси, шу жумладан, 81 та тартибга солиш ва назорат қилувчи органлар, 10 та халқаро ҳукуматлараро ташкилот ва 97 та бозор иштирокчилари ҳисобланади. Шунингдек, кенгашга Қозоғистон, Қирғизистон ва Тожикистон молиявий регуляторлари ҳам аъзо ҳисобланади.
Ислом молияси ҳақида
Ислом молияси — молиявий хизматларни ислом дини шариатига мувофиқ ташкиллаштириб, уни мижозларга ахлоқий қадриятлар асосида етказишдир. Эксперт Алижон Равшанов Тошкентда ўтказилган “Ватандош” интеллектуал клуби мулоқотида бу ҳам худди анъанавий молия каби яхлит бир тизим эканини таъкидлаганди. Ўзини махсус меъёрлари, ҳуқуқий нормалари ва анъанавий молиядан катта фарқлари бор. Ислом молиясида биринчи мақсад шариатга мувофиқлик ҳисобланади. Ҳуқуқшунос Ҳусайн Ражабов ислом молияси фақат банклардан иборат эмаслиги, у барча молиявий муносабатларни ўзида жамлашини қайд этиб ўтганди.
Ўзбекистонда ислом молияси жорий этилиши натижасида қарийб 10 миллиард долларлик инвестициялар жалб қилиниши, 100 мингдан ортиқ янги иш ўринлари яратилиши мумкин.
Ўзбекистонда исломий банк ва молия инфратузилмасини яратиш режалари ҳақида 2018 йилдан бери айтиб келинади. 2023 йилнинг июнь ойида Тошкент шаҳрида ўтказилган халқаро форумда “Apex банк” бошқаруви раиси Баҳром Нўмонов: “Ўзбекистон аҳолисининг 20 фоизи диний сабаб билан анъанавий кредит тизимидан фойдаланмайди”, деб айтганди.
Ўзбекистонда исломий молиялаш тизимини йўлга қўйиш бўйича қонун лойиҳаси ишлаб чиқилди. Ҳужжат қабул қилинса, қонунчиликка жуда кўп ўзгартиришлар киритиш талаб этилади.
Изоҳ (0)