Марказий банк бошқаруви қарори билан микромолия ташкилотларининг исломий молиялаштиришга оид хизматларни кўрсатиш тартиби тўғрисидаги низом тасдиқланди.
Микромолия ташкилотлари ушбу низом талаблари асосида мижозларга исломий молия билан боғлиқ қуйидаги хизматларни кўрсатиши мумкин:
- исломий ижара;
- музораба — фойдани тақсимлашга асосланган молиялаштириш;
- муробаҳа — насия савдога асосланган молиялаштириш;
- мушорака — шерикчилик, яъни фойда ва зарарларни тақсимлашга асосланган молиялаштириш;
- салам — олдиндан тўловга асосланган молиялаштириш.
Исломий молиялаштиришга оид ушбу хизматлар кўрсатилиши учун махсус кенгаш ташкил этилиши лозим. Микромолия ташкилоти иштирокчилари (акциядорларининг) умумий йиғилиши қарорига мувофиқ соҳага ихтисослашган уюшмалар ёки бирлашмалар ҳузурида ташкил этилган ва ушбу низом билан ўрнатилган талабларга мос келувчи таркибдан иборат махсус кенгашни шартнома (аутсорсинг) асосида жалб қилиши мумкин.
Махсус кенгаш аъзоларининг камида бир нафари ислом ҳуқуқи соҳасида олий маълумотга, бир нафари олий юридик маълумотга, қолган аъзолари эса исломий молиялаштиришга оид халқаро сертификатга эга бўлиши лозим.
Бунда микромолия ташкилоти жалб қилинган махсус кенгаш фаолияти билан боғлиқ таваккалчиликларни бошқариш учун жавобгар бўлади.
Тақиқланган ва махсус кенгаш кўрсатмаларига зид бўлган товарлар савдоси билан шуғулланиш ҳамда фаолият турларини молиялаштириш тақиқланади. Хусусан, чет эл валютаси, криптоактивлар, олтин ва кумушларни сотиб олиш учун пул бериш мумкин эмас.
Микромолия ташкилоти исломий молиялаштиришга оид хизматларни кўрсатишда мизожларига исломий молиялаштиришга оид хизматларнинг ўзига хос хусусиятлари ва улар билан боғлиқ таваккалчиликлар ҳақида тушунтириш бериши шарт.
Изоҳ (0)