O‘zbekiston fuqarolarining 20 foizi diniy sabab bilan anʼanaviy kredit tizimidan foydalanmaydi. Bu haqda Toshkentda bo‘lib o‘tayotgan “Fintex, banklar va riteyl” xalqaro PLUS–forumida “Apex bank” boshqaruvi raisi Bahrom No‘’monov maʼlum qildi.
Forum doirasida tashkil etilgan “Markaziy Osiyo mamlakatlarida islom moliyasi va islom banki. Hozirgi holat va istiqbollar” mavzusidagi yalpi majlisda Bahrom No‘’monov maʼruza qildi. Uning so‘zlariga ko‘ra, mamlakat aholisining aksariyati musulmonlar ekanini hisobga olinsa, islomiy moliyalashtirish mahsulotlariga talab ortib bormoqda.
“Bugun butun dunyoda islom moliyasiga bo‘lgan ehtiyoj ortmoqda. Ayni paytda dunyoda islom moliyasining jami aktivlari qariyb 4 trillion dollarni tashkil etadi. Islomiy banking O‘zbekistonga islomiy moliyaning rivojlanishi uchun har yili 10 milliard dollargacha mablag‘ jalb etishi mumkin. Chunki mamlakatda fuqarolarning qariyb 20 foizi diniy sabablarga ko‘ra anʼanaviy kredit tizimidan foydalanmaydi. Ayni paytda respublikada islomiy moliyaviy mahsulotlarni sinovdan o‘tkazish uchun tartibga soluvchi mexanizmlar yaratilgan. Vazirliklar va Markaziy bank islomiy moliya faoliyati uchun qonunchilik bazasini yaratish ustida ishlamoqda”, — deya fikr bildirgan mutaxassis.
Shuningdek, “Hayot bank” boshqaruvi raisi Zohid Alimov ham O‘zbekistonda islomiy moliyaga bo‘lgan talab kattaligini aytgan.
“36 million aholiga ega O‘zbekistonda islom moliyasining istiqbollari 90 foiz darajada yuqori. Chunki aholining ko‘p qismi islom diniga eʼtiqod qiladi” — degan u.
Maʼlumot uchun, “Fintech, banklar va riteyl” xalqaro PLUS–forumi Toshkent shahrida 21–22-iyun kunlari uchinchi marotaba o‘tkazilmoqda. Forumda Markaziy Osiyodagi 110 nafardan ortiq asosiy maʼruzachilar ishtirok etyapti. Anjuman sessiyalarida fintech, bank ishi, islom moliyasi, kriptovalyutalar, blokcheyn, IT, kiberxavfsizlik, masofaviy identifikatsiya, chakana savdo va boshqa yo‘nalishlarni yanada rivojlantirish masalalari muhokama qilinmoqda.
Izoh (0)