Ўзбекистон фуқароларининг 20 фоизи диний сабаб билан анъанавий кредит тизимидан фойдаланмайди. Бу ҳақда Тошкентда бўлиб ўтаётган “Fintex, банклар ва ритейл” халқаро PLUS–форумида “Apex bank” бошқаруви раиси Баҳром Нўъмонов маълум қилди.
Форум доирасида ташкил этилган “Марказий Осиё мамлакатларида ислом молияси ва ислом банки. Ҳозирги ҳолат ва истиқболлар” мавзусидаги ялпи мажлисда Баҳром Нўъмонов маъруза қилди. Унинг сўзларига кўра, мамлакат аҳолисининг аксарияти мусулмонлар эканини ҳисобга олинса, исломий молиялаштириш маҳсулотларига талаб ортиб бормоқда.
“Бугун бутун дунёда ислом молиясига бўлган эҳтиёж ортмоқда. Айни пайтда дунёда ислом молиясининг жами активлари қарийб 4 триллион долларни ташкил этади. Исломий банкинг Ўзбекистонга исломий молиянинг ривожланиши учун ҳар йили 10 миллиард долларгача маблағ жалб этиши мумкин. Чунки мамлакатда фуқароларнинг қарийб 20 фоизи диний сабабларга кўра анъанавий кредит тизимидан фойдаланмайди. Айни пайтда республикада исломий молиявий маҳсулотларни синовдан ўтказиш учун тартибга солувчи механизмлар яратилган. Вазирликлар ва Марказий банк исломий молия фаолияти учун қонунчилик базасини яратиш устида ишламоқда”, — дея фикр билдирган мутахассис.
Шунингдек, “Ҳаёт банк” бошқаруви раиси Зоҳид Алимов ҳам Ўзбекистонда исломий молияга бўлган талаб катталигини айтган.
“36 миллион аҳолига эга Ўзбекистонда ислом молиясининг истиқболлари 90 фоиз даражада юқори. Чунки аҳолининг кўп қисми ислом динига эътиқод қилади” — деган у.
Маълумот учун, “Fintech, банклар ва ритейл” халқаро PLUS–форуми Тошкент шаҳрида 21–22 июнь кунлари учинчи маротаба ўтказилмоқда. Форумда Марказий Осиёдаги 110 нафардан ортиқ асосий маърузачилар иштирок этяпти. Анжуман сессияларида финтеч, банк иши, ислом молияси, криптовалюталар, блокчейн, IT, киберхавфсизлик, масофавий идентификация, чакана савдо ва бошқа йўналишларни янада ривожлантириш масалалари муҳокама қилинмоқда.
Изоҳ (0)