Яшнобод тумани ҳокими Бахтиёр Раҳмонқулов 2024 йил 25 октябрь куни “Яшнобод тумани маҳаллий бюджетининг 2024 йил иккинчи чорак якунлари бўйича шаклланган маблағларни харажатга йўналтириш тўғрисида”ги қарорни имзолади.
Қарор билан Яшнобод тумани ҳокими - 1-сектор раҳбари Б.Раҳмонқуловнинг “Энг ташаббускор сектор” номинацияси ғолиби бўлганлиги муносабати билан пул маблағлари билан тақдирлаш мақсадида, туман маҳаллий бюджетининг 2024 йил 2-чорак якунлари бўйича орттирилган маблағлар ҳисобидан 61 миллион сўмдан зиёд маблағ ажратиш белгиланган.
Бунинг учун Халқ депутатлари Яшнобод туман кенгашининг 23 октябрдаги II-113-108-14-203-К/24-сонли қарори асос қилиб кўрсатилган.
Эътиборли жиҳати, Кенгаш қарорини имзолаган ҳам Бахтиёр Раҳмонқуловнинг ўзи.
Кенгаш қарорида Вазирлар Маҳкамасининг 2021 йил 23 августдаги “Ҳудудларни комплекс ижтимоий-иқтисодий ривожлантириш бўйича секторлар фаолияти самарадорлигини баҳолаш тизимини жорий этиш чора-тадбирлари тўғрисида”ги қарорига мувофиқ ҳамда Яшнобод тумани маҳаллий бюджетининг қўшимча манбалари ҳисобидан амалга ошириладиган тадбирларни умумлаштирувчи комиссиясининг 2024 йил 7 октябрдаги 9-сонли хулосаси ва туман ҳокимнинг биринчи ўринбосарининг таклифларини инобатга олинганлиги қайд этилган.
Қизиқ жиҳати, иккала қарорга ҳам асоссиз равишда “ХДФУ” (хизмат доирасида фойдаланиш учун) белгиси жойлаштирилган. Бундан тахмин қилиш мумкинки, қарорлар даставвал яшириб қўйилган ва кейинчалик адлия бўлими томонидан очиб қўйилган бўлиши мумкин.
Очиқ маълумотларга кўра, бугунги кун ҳолатига Яшнобод тумани ҳокимлигининг 16 та ижро ҳужжати бўйича 674 миллион сўмдан ортиқ қарздорлиги мавжуд бўлиб, транспорт воситалари ва мулклари тақиққа олинган.
Эслатиб ўтамиз, ўтган йилнинг август ойида Қарши шаҳри ҳокими Нормўмин Холбоев ўзини рағбатлантириш учун 75 миллион сўм маблағ ажратиш ҳақида қарор чиқарганди.
Изоҳ (0)